Furgonët e shkollave në grevë/ Kaos në transportin e fëmijëve, shkak ligji i pazbatueshëm

2 Tetor 2017, 17:55, Aktualitet CNA

U desh që shoferët që bëjnë transportin e fëmijëve të shkollave 9-vjeçare dhe atyre të mesme të bënin një grevë një ditore që të nxirrnin në pah një problematikë tejet serioze, si ajo ofrimit të këtij shërbimi dhe bllokimi nëpërmjet një ligji absurd.

Greva e tyre ka paralizuar aktivitetin e shumë familjeve, dhe vjen si pasojë e gjobave të rënda në kuadër të zbatimit të ligjit të ri, për unifikimin e këtij shërbimi dhe standardizimin e tij.

Puna ekstra pas ofrimit të shërbimit të transportit të nxënësve të shkollave, ka bërë që policia të vendosë gjoba të majme në kurriz të shoferëve apo edhe kompanive që ofrojnë këtë shërbim.

Standardizimi i këtij shërbimi, është për tu përshëndetur por ka një problem i cili do diskutuar në këtë mes, për shkak se nëse sot ishte dita e parë e një greve, dhe paralizoi jetën normale të një familje, duke i bërë që të humbnin ditën e punës, nesër kjo mund të përshkallëzohet me një grevë pa afat.

Transporti i fëmijëve në shkolla

Shërbimi i transportit të fëmijëve dhe ndërhyrja për rritje cilësie është një masë që duhet përshëndetur, pasi standardizimi i këtij sektori është diçka që duhet të vijë, por kur kërkojmë që ta standardizojmë dhe njëvelftësojmë me shërbimin që ofrohet në Amerikë dhe në vendet e BE-së, duhet që llogarritë ti bëjmë me vlerat, kostot e jetesës në BE krahasuar me Shqipërinë.

Pra duam cilësinë dhe standartet e BE, shërbimin e BE por rrogat janë disa herë më të ulta. Ndërhyrjet e bëra nga Ministria e Transporteve disa kohë më parë kërkojnë që furgonat e shkollave të jenë vetëm për atë shërbim, por a ka mundësi dhe kosto reale që kjo të përballohet, nga vetë shkollat publike apo private, qoftë edhe nga vetë familjarët që paguajnë këto kosto.

Sot një furgon që bën transportin e fëmijëve në shkolla merr 8 fëmijë. Nëse sot një familje për transportin e fëmijës për në shkollë paguan 5 mijë lekë, për 8 fëmijë që transporton, kompania apo personi fizik merr 40 mijë gjithsej.

Nëse me këto 40 mijë paguhet shoferi, po kostot e amortizimit, transportit, taksat e automjetit etj., kush do t?i paguajë? Kjo nuk është marrë parasysh nga hartuesit e ligjit, të cilët thanë për ?CityNews?, se ligji aktual është i pazbatueshëm në kushtet e Shqipërisë.

Në lidhje me këtë ka vetëm dy zgjidhje; ose shteti të subvencionojë pjesën tjetër, që janë kostot e amortizimit, transportit, taksave etj.; ose të rritet çmimit i këtij shërbimi. Nëse tarifa e këtij shërbimi do të rritej, do të duhej që së paku të dy apo trefishohej, e cila do të binte në kurriz të fëmijëve dhe rrjedhimisht do të rëndonte në xhepat e familjarëve.

Kjo sepse ligji rrit shumë kostot, dhe së dyti nuk ka një periudhë tranzitore për tju dhënë edhe vetë mundësinë institucioneve arsimore të zgjidhin këtë problem që sërish do shkojë me kosto shtesë për mijëra familje shqiptare.

Një shembull i thjeshtë për kostot. Në një familje ku prindrit marrin një pagë mesatare 40 mijë lekë të reja, sot paguan për 2 femije 10 mijë lekë, me rritjen e kostove të shërbimit i duhet të paguaje 2 deri 3 herë më shumë.

Një familje me dy fëmijë do ta kishte të vështirë këtë kosto, sepse do të shkonte në 20-30 mijë lekë të reja në muaj, pra gati 70% e rrogës të një prindi shkon për transportin e fëmijëve. Dhe nëse familja ka dy kryefamiljarët të punësuar, që le të llogarisim që marrin nga 40 mijë lekë në total 80 mijë, sërish kjo është e papërballueshme për jetesën në Shqipëri, ku rroga është e ulët, por çmimet dhë kostot të larta.Gati 1/3 e rrogës për transportin e fëmijëve.

Por cila është zgjidhja?

Për të zgjidhur një situatë të tillë, e cila që në gjenezë është me probleme, do të duhet ndërhyrja e shtetit. Shteti, pra pushteti qëndror ose ai lokal, duhet të marrë masa; ose për subvencionime; të lërë një periudhë tranzitore deri kur të hartohet një ligj i posaçëm duke patur për bazë kushtet e Shqipërisë, e jo ta marrë ?copy paste? si në këtë rast; ose të lejojë kompanitë që krahas shërbimit të transportit të nxënësve të shkollave, të mund të bëjnë edhe transporte të tjera, si atyre të administratave të kompanive private. Kjo e fundit aktualisht ndodh.

Në të kundërt mund të kemi një kolaps, pasi bllokimi i furgonave dhe kalimi i tyre në grevë të plotë do të sillte një tjetër kosto për familjet. Bëhet fjalë për arsimin e fëmijëve, dhe kështu prindërit do të duhet të lënë punën për të çuar fëmijën në shkollë ndërkohë që duhet të shkojnë vetë në punë

Qeveria nuk mund të prodhojë ligje dhe nxjerë vendime që rritin kostot për familjet apo ju krijojnë probleme të panevoshme. Një çështje që është e zgjidhur kthehet në ngërç sepse del një ligj i pazbatueshëm. Fakt që e pranojnë vetë zyrtarët e Ministrisë të Transporteve. Një ligj në kushtet dhe kostot e Shqipërisë, me standarte dhe rregulla të forta duhet, por jo duke u kthyer në makth për familjarët dhe kosto shtesë. Me kopje ligjesh të një vendi ku të ardhurat për frymë janë 20 mijë euro në vit nuk mund të zbatohet në një vend ku ato janë 3 mijë. /CityNeës