Demiraj shpërthen pas deklaratës së Lu-së / Bandat që udhëheqin janë nga 'gjiri' i PS-së

2 Tetor 2017, 19:22, Aktualitet CNA

Ish-ministri i Brendshëm Dritan Demiraj, ka reaguar pas deklaratave të ambasadorit amerikan në Tiranë, Donald Lu, i cili u shpreh se janë 4 klane dhe 20 familje kriminale që kontrolojnë Shqipërinë.

Në një intervistë për “Tpz.al“, Demiraj shprehet se kjo situatë nuk është e sotme, por vijon prej 4 vitesh, ku banda kriminale që kanë dalë haptazi në mbështetje të Partisë Socialiste, komandojnë në vendin tonë.

“Prej kohësh, Shqipëria, jo sot, por prej 4 vitesh, e vërteta është se në territorin e Shqipërisë komandojnë disa banda, të cilat dolën haptazi në mbështetje të Partisë Socialiste gjatë fushatës zgjedhore. Ngjarje, të cilat janë identifikuar nga ne dhe janë raportuar në të gjitha raportet, por dhe në raportet e OSBE ODHIRi-t, i cili doli 4 ditë përpara. Në këtë konteks,t kemi pasur disa mbledhje të taks-forcës unë i kam raportuar zv.kryeministres dhe pjesëtareve të tjerë të taks-forcës për përfshirjen e tyre në afera politike. Në bashkëveprim me Policinë e Shtetit, disa drejtues të Policisë së Shteti, të cilët haptazi e kanë mbështetur Partinë Socialiste, këto banda kanë pasur lirinë e veprimit, pasi dihet që prej kohësh një pjesë e tyre ka siguruar një sasi jo të vogël votash për Partinë Socialiste.” ? është shprehur ndër të tjera Demiraj për Tpz.al.

Por përveç kësaj në 3 muajt e qëndrimit në detyrë, Demiraj ka evidentuar edhe komisariatet problematike, që sipas tij janë të komanduara nga krimi.

“E në këtë kontekst, do vinte një ditë që sot, Ministri i Brendshëm z.Xhafa ka filluar të shtrëngojë masat dhe krimi duke qenë nën presionin e Policisë së Shtetit, ka filluar të reagoje. Kemi pasur komisariate, si komisariatet e Dibrës, komisariatet e Shkodrës, Lezhës, Komisariatin e Pukës, të cilat në kuptimin e keq të fjalës, janë shquar në raport me komisariatet e tjera për mos ushtrimin e kontrollit të territorit, mos zbatimin e ligjit, mos arrestimit.”, – shtoi Demiraj.