Kushtet e Ramës për BE-në/ Ne kemi nevojë për ju, kurse ju keni nevojë për Ballkanin e qetë

22 Shtator 2017, 15:56, Aktualitet CNA

Kryeministri Edi Rama ndër të tjera në fjalën e tij sot para përfaqësuesve të shteteve në Asamblenë e Përgjithshme të OKB-së foli për procesin e zgjerimit të BE-së me vendet e Ballkanit Perëndimor.

?Ne duam të masim ecurinë tonë me rezultate. Presim që partnerët tanë të BE-së të bëjnë pjesën e tyre në hapjen e bisedimeve. Shpresojmë që BE pavarësisht krizës aktuale të mendojnë se procesi i zgjerimit është mënyra më e mirë për të siguruar mirëqënie dhe siguri. Pak muaj më parë qytetarët më rivendosën në krye të qeverisë. Së bashku me Bashkimin Europian kërkojmë që të krijojmë një zonë ekonomike rajonale që të rrisë tregtinë për të mirën e ekonomive tona. Kështu do të jemi më të aftë për të mbrojtur dhe forcuar marrëdhëniet fqinjërsore, respektimin e pakicave. Një lidhje e shëndetshme me BE-në është e rëndësishme për perspektivën dhe zhvillimin e reformave në Ballkan?,- tha Rama ndër të tjera në fjalën e tij.

Më tej kryeministri foli për raportin Shqipëri-BE dhe pranimin sipas tij të Kosovës në çdo institucion rajonal dhe ndërkombëtar me të drejta të plota:

?Aq sa Shqipëria ka nevojë për BE-në, aq edhe BE-ja ka nevojë për një Ballkan të sigurt dhe koherent. Kjo është arsyeja pse ne mendojmë se pranimi i Kosovës në çdo institucion rajonal me të drejta të plota është një nevojë thelbësore?,-tha Rama i cili shtoi:

?Ka patur nga ata që kanë shprehur frikën në këtë foltore se çlirimi i Kosovës do të lironte forca të rrezikshme gjë që ne nuk e kemi parë. Qytetarët e Kosovës janë demokratike dhe kontribuojnë në demokracinë e rajonit. Bashkëjetesa multietnike në Kosovë, qeverisja e mirë dhe respektimi i të drejtave të njeriut janë të dukshme. Ballkani perëndimor sot është shumë më i mirë se 3, 5 apo 10 vjet më parë. Pavarësia e Kosovës u shndërrua në një rrip stabiliteti për të gjithë rajonin. Serbia dhe Kosova janë prej disa vitesh në një dialog serioz për formalizimin e marrëdhënieve mes tyre. Kjo ka krijuar një klimë besimi mes 2 vendeve?,- vijoi Rama fjalën e tij. /Citynews