E fundit!

21:36 Politikë

Protestuesit e larguan nga protesta/ Zmbrapset Shehaj

Një ditë më parë protestuesit e larguan nga protesta kreun...

Letër e shoqes Themie Thomai për kolegun e saj të sotëm shokun Themi Peleshi

31 Gusht 2017, 18:32, Aktualitet CNA

I dashur koleg!

Kam dëgjuar se tani që kryeministri Rama të emëroi Ministër të Bujqësisë kanë nisur të të quajnë Themi Peleshi, sipas emrit tim që kam qenë Ministre Bujqësie në kohën kur Shqipërinë e udhëhiqte shoku Enver. Kur mora vesh lajmin që je bërë Ministër i Bujqësisë mendova se mos kryeministri ynë ta kishte bërë siç ma bëri mua shoku Enver. Kur do të më bënte ministre të bujqësisë, shoku Enver më thirri e më tha se Partia (domethënë ai) kishte menduar të më bënte Ministre të Industrisë së Lehtë. Unë i thashë: ?Nuk e bëj dysh fjalën e Partisë shoku Enver, por nuk marr vesh nga Industria e lehtë?.

Shoku Enver qeshi, sa bukur qeshte ai, dhe më tha: ?Themie, në të vërtetë Partia ka vendosur të të bëjë ministre të Bujqësisë por ta thashë kështu për të parë si do të reagojë!?

?Nga bujqësia marr vesh, shoku Enver, se në fshat jam lindur e rritur e në bujqësi kam punuar që kur jam ngritur në këmbë.?

?Prandaj të ka zgjedhur Partia, shoqja Themie?, më tha shoku Enver.

?Të rrojë Partia dhe të na rroni ju sa malet shoku Enver!? i thashë.

Dhe kështu u bëra Ministre Bujqësie. Por së paku kisha lidhje me bujqësinë. Por ti more djalë nuk ke asnje lidhje me bujqësinë, je inxhinier mekanik, madje dhe si i tillë nuk ke punuar asnjë ditë.

Me sa më thanë e vetmja lidhje që ke me bujqësinë është se kur ke qenë gjimnazist në kohën tonë, ti ke punuar një muaj punë fizike në bujqësi, siç e quanim në atë kohë. Me këtë përvojë pune në bujqësi u bërë ministër në 2017.

Mos e merr për ofendim kur të thonë Themi Peleshi, por ta kesh për nder se unë e kam pasur zanat bujqësinë, ti ke zanat politikën.

Megjithatë tani që e pranove postin e Ministrit të Bujqësisë, të uroj suksese, domethënë kështu është zakon të thuhet në këto raste, sepse në realitet ti as do të merresh me bujqësinë dhe as Kryeministri ynë nuk ta kërkon këtë gjë. Ministria e Bujqësisë është sot siç ishte në kohën tonë Ministria e Drejtësisë, që ishte kot, sa për emër, deri kur e hoqën fare. Sot sektorin e Bujqësisë e mbulon Ministria e Punëve të Brendshme se ashtu ka ardhur koha. Dikur ne kishim parullën ?Ta sigurojmë bukën në vend!? dhe bëhej fjalë për bukën e një viti. Sot bujqësia jonë me rendimente të larta i ka mbushur tunelet me hashash sa për tre vjet shitje, dhe nuk ka me se të merret Ministria e Bujqësisë.

Kështu që ti koleg, sorollatu kot korridoreve të ministrisë tënde dhe vitin e katërt shiko se mos hapet ndonjë punë për ty. Deri atëherë mbeç me të mira e suksese në jetë. Të na rrojë Partia!

Me dashuri Themia!

/Citynews