"Digjni" politikanët në vend të pyjeve

23 Gusht 2017, 10:01, Aktualitet CNA

Vendi jonë ka kohë që vazhdon të jetë nën udhëheqjen e flakëve, të cilat po shkatërrojnë një pjesë të mirë të natyrës shqiptare.

Çdo ditë shënohen vatra zjarri që jo pak herë kanë rrezikuar edhe jetët e banorëve të zonave përreth zjarreve. Sipas informacioneve nga policia, shumica e zjarreve kanë qenë të qëllimshme, duke shkaktuar dëme të pa riparueshme në natyrën e Shqipërisë e disa herë edhe në zona të mbrojtura. Ndërsa disa nga zjarrvënësit janë arrestuar e disa të tjerë po gjykohen në gjendje të lirë.

Dhe ndërkohë që ne paguajmë çdo muaj taksa për të të mbrojtur vendin tonë, qeveria jonë nuk është e aftë që të ruajë pyjet, shqipëria po digjet ndërsa qeveria është e paaftë dhe nuk ka qoftë edhe një helikopter që të shuajë zjarret. Jemi ende primitive në këtë aspekt.

Madje ndërkohë që paratë tona mblidhen çdo muaj në arkën e shtetit, detit i dalin pronarë. Ndërkohë që në çdo vend të botës ka nga disa rreshta shezllonë, ndërsa pjesa tjetër e plazhit është nën shërbim të qytetarëve që duan të bëjnë plazh me çadrat e tyre, por jo në Shqipëri duhet të paguash edhe për tokën ku shkel.

E ndërsa një turist detyrohet të paguajë edhe banjon e lokalit, ku në çdo zonë turistike abuzohet me çmimet, të cilat në krahasim me shërbimin lënë shumë për të dëshiruar.

Edhe ndërkohë që çudirat në vendin tonë nuk mbarojnë, kryeministri Edi Rama poston çdo mëngjes video të turizmit ?perfekt? me njerëz super të kënaqur, duke harruar që shqiptarëve iu është mohuar e drejta të përdorin detin, që zonat e mbrojtura po digjen edhe që turistët po diskriminohen duke u përpallur me çmime të kripura.

Revolta e njerëzve me mjerimin, papunësinë, tashmë edhe me rrezikun e heqjes së vizave, i shtyn të shfryhen me turistët dhe të djegin pyjet duke dëmtuar natyrën ku nesër do të rriten fëmijët tanë.

Pavarësisht gjithë këtyre problemeve që çdo ditë raportohen në media, e që dihen nga të gjithë përveç politikanëve, vazhdojmë akoma të dëmtojmë natyrën e vendit tonë të largojmë turistët. Ndërkohë që ata që duhen djegur e larguar janë drejtuesit mizorë të Shqipërisë.

A nuk do ishte më mire që në vend të pyjeve “të digjej” parlamenti, për të shpëtuar njëherë e mirë nga zaptuesit dhe masakruesit e vendit tonë./CityNews