Nga Artur AJAZI/ Çfarë (s) i mungon politikës shqiptare

23 Gusht 2017, 08:39, Aktualitet CNA

Megjithëse në dukje politika shqiptare të qartëson mendimin se, është pjekur dhe është bërë më e përgjegjshme duke fituar eksperiencën e duhur, gjithmonë gabohesh. Politikës shqiptare dhe aktorëve të saj, edhe pas 27 vitesh, i mungon gjëja më kryesore, që është dukuria e veçantë në politikën moderne botërore, që është kohezioni. Ky komponent i politikës, në vendet e zhvilluara, mbetet nga elementët kryesorë që vendos ndryshimin.

Në politikën shqiptare në dy dekadat e fundit, mungesa e kohezionit, nuk është e vështirë të zbulohet, mjafton të verifikosh rezultatet e zgjedhjeve të fundit të 25 qershorit, pa përmendur pastaj ato të kaluarat. Lehtësisht konstaton se pas dy forcave të mëdha politike PD dhe PS, renditet forca politike LSI. Po ti lexosh me kujdes, konstaton se tek programet e të gjitha forcave politike nuk ka shumë dallime esenciale.

Por në veçanti pas tre partive që vendosin fatin e qeverisjes, vjen një grup tjetër forcash politike, me 1 deri 2 për qind të votave sejcila prej tyre, dhe më pas një grumbull prej rreth dhjetë minipartish, që arritën të shkëputin 05 deri 07 për qind të votave seicila prej tyre. Këto të fundit, nuk kanë specifika të veçanta programore dhe personazhe në jetën politike në Shqipëri, dhe së fundi mbeten disa parti që nuk marrin asnjë votë. Rezultatet konstatojnë se kemi të bëjmë me tre grupime partish, që e kanë të nevojshme rritjen e seriozitetit , përmirësimit të programeve të tyre, dhe rritjen e kohezionit e bashkëpunimit.

Rast i LSI-së, mbetet unikal , pasi kjo parti pasi mori diçka nga votat e shqiptarëve, u rreshtua jo papritur përkrah Partisë Socialiste , dhe i dha shqiptarëve shansin të provojnë në 4 vitet e shkuara qeverisjen tërësisht të majtë. Kjo parti (pra LSI) ka arritur të marrë numër pothuajse në zbritje votash në të tëra rrethet e vendit. Ky tipar, duket se e bën këtë parti të ngjashme me forcat e mëdha politike në vend.

Ky është një element tipik kohezioni, element që i mungon pjesës më të madhe të partive të tjera të vogla. Vihet re dukshëm se LSI-ja, ka marrë 19 deputetë në 25 qershor, ndërsa republikanët me 2 për qind, kanë marrë vetëm një deputet, ndërsa socialdemokratët edhe pse me numër votash diçka më pak se republikanët, kanë arritur të marrin një deputet këto zgjedhje.

Ky është një shembull ?deformimi?, i rezultatit të zgjedhjeve, pasi në rast të një përpjestimi të thjeshtë, raporti midis këtyre tre partive dhe përfaqësimi i tyre në Kuvendin e ri do ishte ndryshe. Një ndikim të dukshëm në ?deformimin? e zgjedhjeve solli edhe dukuria e koalicioneve. Koalicionet 4 vjet më parë u formuan me nxitim, pa piketuar me specifika mënyrën, llojin dhe masën e kontributit të sejcilës forcë politike në aleancë, pa përcaktuar gjithçka duhet.

Këto aleanca nuk ishin gjë tjetër, veçse amalgama jetëshkurtëra, me dhe pa përfitime të ndjeshme nga palët në koalicion. Shpesh në politikën shqiptare, bëhet fjalë për parti që edhe pse të vogla, duhet të jenë serioze, dhe jo të luftojnë që të jenë në koalicione vetëm për karrige drejtorësh në ndonjë dikaster. Statistikat tregojnë se shumica e partive të vogla nuk kanë qenë përfaqësuese të interesave të votuesve të tyre, por janë thjesht subjekte për të përfituar fonde. Shqiptarët në zgjedhjet e fundit, treguan qytetari , qetësi dhe dëshirë për normalitet .

Ata shkuan në zgjedhjet e 25 qershorit 2017 me mendimin se nga këto zgjedhje duhet të fitojë Shqipëria, dhe ata të kenë një përfaqësim të drejtë në Kuvendin e ri. Tek vota e shqiptarëve, u pa qartë se votuan jo vetëm vetëm dy partitë e mëdha, (kryesisht për PS e Ramës) por edhe pjesërisht për LSI. Ndërsa përsa i përket partive të vogla, shumica e votuesve e kanë kuptuar se ato, duhet akoma ti përshtaten kohezionit, dhe pastaj të kenë përfaqësim në Kuvend .

Kohezioni detyrimisht duhet të jetë dominant në politikën shqiptare, tek partitë e vogla dhe ato të mëdha . Kjo dukuri do të bënte balancimin dhe përcaktimin e shtresave shoqërore duke u nisur nga platformat dhe pikëpamjet e tyre mbi zhvillimin e vendit./CityNews