Sqepi i Dallëndyshes nuk u ngop

23 Gusht 2017, 08:28, Aktualitet CNA

Dallëndyshja njihet si shpend me sqep të vogël që cukit nga pak ushqim, por Dallëndyshja për të cilën po flasim e cila duhet të jetë gardiania e ndërtimeve pa leje e ka sqepin e madh shumë si fadromë. Dhe këto javët e fundit, Dallëndyshja e cila nuk e ka të sigurt nëse do ta ruajë postin pas ndryshimeve që do të bëjë Edi Rama në shtator, po mbledh para me fadromë, duke vënë gjoba, të cilat janë zyrtare vetëm atje ku nuk i japin rryshfet, domethënë po punon për xhepin e saj.

Dallëndyshet janë shpendë që cicërojnë me zë të ëmbël, por kjo Dallëndyshja me sqepin si fadromë, iu ulërin me zë të çjerrë vartësve të saj të cilët i dërgon për inspektime: ?Gjeni shkelje patjetër ndryshje ju pushova nga puna!?

Dhe pastaj Dallëndyshja dërgon sekserët e saj për të negociuar për pagimin e gjobës jo në arkën e shtetit por në xhepin e saj. Themi në xhep se kështu është fjala, por në fakt duhet thënë në dyshek apo më saktë në dyshekët, sepse Dallëndyshja ka mbushur dyshekë me para.

Nëse hapni faqen zyrtare online të institucionit që drejton Dallëndyshja, do të vini re se atje nuk ka një CV të saj. Në lidhje me këtë ka një histori të bukur që do ta tregojmë herën tjetër. Sa për mungesën e CV-së arsyeja është se Dallëndyshja nuk ka kishte asnjë CV para se ta emëronin në postin e saj të rëndësishëm. Madje nuk kishte as një CV të thjeshtë.

Bilanci i katër vjetëve punë të Dallëndyshes është se janë prishur vetëm ndërtimet pa leje të atyre që nuk kanë paguar gjobat në xhepin e Dallëndyshes, si dhe të atyre ku ka pasur interes dikush i lidhur me qeverinë për të bërë ndërtime me leje.

Dallëndyshja e cila deri në 2013 çukiste me sqepin e saj nëpër fast foode dhe byrektore të lira, tani është bërë një nga femrat më të pasura në Shqipëri, frekuentuese e restoranteve të shtrenjtë, degustatore e pijeve të zgjedhura, gjë për të cilën kanë dalë fotografi edhe në media. Dallëndyshja e cila dikur pinte alkool të lirë, tani e pi uiskin e shtrenjtë me fadromë.

Dallëndyshja vetë në fakt është thjesht seksere e dikujt ndaj të cilit Edi Rama kishte detyrime të mëdha, por që nuk i jepte dot një post të lartë, se ashtu i kishte ca letra jo në rregull. Ky dikushi, të cilin këtë herë le ta quajmë Korbi, i propozoi Edi Ramës Dallëndyshen, duke i thënë se po të emëronte atë ishte njëlloj sikur të kishte emëruar ?Korbin? vetë.

Kur të nisë të funksionojë SPAK-u në Shqipëri, zyra që në kuadrin e reformës në drejtësi pritet të luftojë korrupsionin, Dallëndyshja duhet të jetë ndër zyrtaret e para të larta sqepi i së cilës duhet të ngecë në rrjetën e SPAK. Nëse Dallëndyshja dhe ata si ajo i shpëtojnë rrjetës së SPAK atëherë e gjithë reforma për drejtësi do të jetë një lojë politike./Citynews