Faktet/ Rama pranon dështimet në katër vite

10 Gusht 2017, 12:26, Aktualitet CNA

Kryeministri i vendit, Edi Rama pas 4 vitesh bashkëqeverisje në krye të vendit me Ilir Metën, arriti të merrte në dorë timonin i vetëm.

Megjithëse qeverisja e katër viteve më parë u bë burim i shumë skandaleve, Rama arriti t?i bindte qytetarët që t?i besonin edhe njëherë, e kjo tashmë është fakt.

Aleati i tij në qeverisje, Ilir Meta, sot President, gjatë kohës së fushatës e ka akuzuar shpeshherë Ramën për lidhjet me krimin, drogën, dhe dështimet në qeveri duke hequr çdo përgjegjësi nga vetja e tij.

Nëse pak ditë më parë dikush edhe mund të çuditej nga dështimet e qeverisjes të thëna nga Meta, sot kreu i qeverisë, vetë Edi Rama po i përsërit njëra pas tjetrës, teksa kërkon të gjejë edhe samarët për t’i kryqëzuar si fajtorë.

Menjëherë pas rikonfirmimit të tij si kryeministër i Shqipërisë, Rama me ekipet e punës, të përbërë nga më të besuarit e tij, vizitoi çdo qark të vendit për t?u përballur me problemet e qytetarëve.

Pra që në fillim sapo mori mandatin e dytë, Rama e dinte se i pari kishte qenë dështim, ndryshe nuk do të dilte derë më derë për të regjistruar problemet e hallet e njerëzve, sikur për katër vite të kishte qenë opozitë dhe jo qeveri.

Pas takimeve me qytetarët, të cilat i mbylli bashkë me muajin korrik, Rama ka filluar të publikojë raportin e problemeve dhe halleve të njerëzve për çdo qark, një pranim tjetër nga ana e tij se këto katër vite nuk kanë qenë aspak të mira për qytetarët.

Së fundmi nëse shohim të gjitha raportet për çdo qark të publikuara nga Rama vihet re që vuajtja e qytetarëve shqiptarë varion tek të njëjtat probleme si në vitin 2013.

Edhe pas katër vitesh qeverisje të Ramës, këtë herë e publikuar dhe e pranuar nga vetë kryeministri, njerëzit akoma vuajnë nga legalizimet, mungesa e ujit të pijshëm, punësimi, ndërprerja e energjisë elektrike, situata e të cilës për hir të së vërtetës është përkeqësuar në krahasim me qeverisjen e Sali Berishës.

Pra janë këto probleme dhe kërkesa të qytetarëve, që në vitin 2013, Rama i kishte premtimet kryesore në programin e tij të Rilindjes, por që sot pas katër vitesh, në 2017, Rama i përsërit akoma, sikur në katër vitet e shkuara të ketë bërë opozitë në këtë vend./CityNews