Rezultatet/Si e ndëshkuan korçarët Lulzim Bashën me votë

10 Korrik 2017, 13:23, Aktualitet CNA

Zgjedhjet e 25 qershorit ishin një disfatë e madhe për Lulzim Bashën dhe Partinë Demokratike edhe në Qarkun e Korçës. Rezultati për Bashën në Korçë ishte po aq katastrofik sa në qarqet e tjera. Korçarët, zemërata e të cilëve u duk hapur që me listën personale të kandidatëve për deputetë që Basha iu serviri, e treguan hapur zhgënjimin ndaj kreut demokrat edhe me votën e tyre më 25 qershor.

Në grafikun e publikuar nga ish-deputeti i PD, Kastriot Islami, mbështetur në shifrat zyrtare, duket se PD së bashku me aleatët ka pësuar një rënie të thellë në juglindje, teksa PS e vetme ruan pothuajse të njëjtat vota që ka pasur në zgjedhjet e 2013. Pra, Edi Rama edhe pse në këto zgjedhje garoi pa aleatët ka ruajtur linjën e saj të 2013, me të njëjtat vota në kuti, 0.03%. kurse PD ka pësuar rezultatin katastrofik, duke humbur 7.05% të votave, edhe pas 4 vitesh në opozitë.

Kjo tregon qartë se qytetarët janë më të zhgënjyer me opozitën e Lulzim Bashës, se me zullumet e qeverisë Rama. Momenti më i vështirë për një opozitë është dita kur del si e tillë, dhe pas kësaj dite ajo fillon të mbledhë vota, qytetarë të zhgënjyer nga qeverisja, dhe në katër vite rritet e konsolidohet për të garuar më e fortë. Kjo nuk ka ndodhur me opozitën e Bashës, i cili si asnjëherë tjetër e çon PD-në në rezultatet më të thella humbëse.

Po të analizojmë me detaje grafikët e rezultatit zgjedhor, demkratët janë në minimumin e tyre historik në Bashkinë e Korçës, e cila është një ndër katër bashkitë që mbështet më shumë socialistët. Demokratët siguruan në Bashkinë Korçë 9100 vota, duke fiksuar kështu rezultatin më të ulët historik.

Në zgjedhjet e 2013, PD siguroi e vetme rreth 10500 vota, ndërsa më 2017 PD së bashku me aleatët mori gati 15% më pak vota në qytetin e Korçës, një disfatë e pafalshme kjo për kreun demokrat.

Kjo tregon qartë se PD dhe Basha nuk kanë arritur t?i ?vjedhin? Ramës asnjë votë gjatë këtyre katër viteve. Kjo jo se korçarët mund të jenë të gjithë të kënaqur me rezultatet e qeverisë Rama, por se Basha është treguar i paaftë në organizmin dhe drejtimin e strukturave të PD, duke krijuar më shumë përçarje se sa bashkim.

Të gjitha gabimet e tij morën vlerësimin e duhur më 25 qershor, ku qytetarët korçarë, por dhe më gjerë, ndëshkuan me votë kreun demokrat./CityNews