Fitore e pavlerë/Dy qarqet blu që turpëruan Lulzim Bashën

10 Korrik 2017, 11:56, Aktualitet CNA

Partia Demokratike pësoi një humbje të thellë në zgjedhjet e 25 qershorit. Nën drejtimin e Lulzim Bashës, PD shënoi një rezultat katastrofik në të gjitha qarqet, madje dhe në bastionet historike të së djathtës. Në një grafik të publikuar nga ish-deputeti i PD, Kastriot Islami, ku bëhet një krahasim me vitin 2013 dhe rezultati në përqindjen e votuesve i siguruar nga partitë, rezulton se PD ka pësuar rënie në çdo qark.

Partia Demokratike humbi edhe aty ku doli forcë e parë. Në fakt, Lulzim Basha nuk fitoi në asnjë vend, ai ishte humbësi i madh i këtyre zgjedhjeve. I dha partisë një rezultat të padëgjuar ndonjëherë, që nga themelimi, dhe nuk pranoi të japë dorëheqjen, por kërkon sërish karrigen e selisë blu.

Ai pësoi një rënie të thellë në bastionin historik të së djathtës, aty ku PD s?e kishte njohur më parë një rezultat të tillë, në Shkodër. Edhe pse me aleatët, Basha humbi një numër të madh votash nga viti 2013, përballë Ramës që garonte i vetëm dhe prapë nuk e pësoi një humbje të tillë. Një tjetër detaj jo pak i rëndësishëm vlen për t?u përmendur në lidhje me rezultatin e Ramës në Shkodër, ku doli me 5.99% më pak, që ka të bëjë me dy deputetët e dalë në radhët e dy partive ish-aleate me PS. Është deputeti i zgjedhur LSI, Agron Çela, dhe deputeti Tom Doshi i PSD. Të gjitha këto rezultojnë të jenë vota të ?vjedhura? nga PD, e cila në krahasim me zgjedhjet e 2013 humbi më 25 qershor 8.09% të votave. Ky pra ishte një dështim i turpshëm i Bashës në qarku e ?veshur? blu.

Një gropë e thellë elektorale për PD ishte edhe Qarku i Kukësit, një tjetër zonë ?blu? e kësaj fushate, që zhgënjeu demokratët. Fitorja ishte e mundimshme, ku po të mos ishte deputeti i zgjedhur Isuf Çelaj, i dyti në listë, PD rrezikonte mandatin e dytë.

Kukësi dha një rezultat surprizë më 25 qershor në të dyja kahët politikë, qoftë në PS apo PD. E para fitoi e vetme 16.49% të votave, kurse PD humbi 10.84% të votave, një humbje dramatike kjo që vetëm me Bashën drejtues e njohu opozita.

Pra, Partia Demokratike ka pësuar rënie edhe pse është në koalicion, në Shkodër dhe Kukës, duke regjistruar humbjen më të thellë historike.

Demokratët e Bashës pësuan rënie dhe aty ku e kishin shpallur fitore, në dy zonat blu të fushatës, duke shkuar drejt greminës. Këtu mund të përmendim dhe faktin se në Qarkun e Kukësit dy bashkitë kryesore drejtohen nga demokratët, apo edhe në Shkodër dy bashkitë, Shkodra dhe Vau i Dejës janë pikërisht në duart e demokratëve. Kjo përjashton mundësinë e blerjes së votave, justifikimi i vetëm i dëgjuar nga Basha pas rezultatit të turpshëm./CityNews