Zgjedhjet e 25 qershorit/Ja sa mandate ndajnë partitë në Vlorë sipas votave në dy përballjet e fundit

24 Maj 2017, 11:13, Aktualitet CNA

CityNews po bën një projeksion të rezultatit të zgjedhjeve, sipas pjesëmarrjes dhe shifrave zyrtare të vitit 2013. Këto janë të vetmet shifra, me të cilat mund të përllogariten votat e çdo force politike, por në kushtet e reja të tërheqjes së partive të vogla aleate majtas apo djathtas, sërish është më e lehtë për të dalë në një përfundim dhe për të bërë një projeksion të përafërt të rezultatit të zgjedhjeve.

Në qarkun e Vlorës, lista e zgjedhësve ka 293.169 persona. Në zgjedhjet e vitit 2013 kanë votuar 122.873 persona. Qarku i Vlorës ka 12 mandate deputetësh dhe një mandat shkon 10.138 vota. Në zgjedhjet e vitit 2013, PS së bashku me aleatët kanë 78.099 vota, ndërsa LSI ka 10.552 vota dhe PBDNJ 6323 vota.
Socialistët në Vlorë, në rast se ruajnë votat që kanë, duke iu shtuar edhe 3044 vota të kandidatit të pavarur Arben Malaj, i cili pritet që të mbështesë hapur Partinë Socialiste, PS dhe aleatët e saj, pa LSI, kanë të siguruara 7 mandate deputetësh.

LSI duke ruajtur votat e vitit 2013, pra numrin prej 10 552 votash, mund të sigurojë 1 mandat në qarkun e Vlorës.

PD dhe aleatët e saj kanë rreth 37 733 vota, ku PDIU ka 6782 vota. Në fakt mund të ketë një ndarje të votave të koalicionit të PD dhe otave të PDIU, për shkak se deputeti çam, Dashamir Tahiri, mund të kandidojë nga Partia Republikane. Pra, ndarja e 6782 votave midis PDIU dhe Dashamir Tahirit nga PR mudn të?i japë koalicionit të djathtë një ulje votash, që shkojnë afërsisht në 31 mijë vota dhe rreth 3 mandate.

Në Qarkun e Vlorës një mandat deputeti është ende i hapur midis socialistëve dhe aleatëve të tyre, PD dhe aleatëve të saj, PR apo PDIU. Këto dy të fundit do përplasen për votat dhe mandatit e siguruar nga Dashamir Tahiri në vitin 2013.

Në zgjedhjet e vitit 2009, sipas votave, rezulton që socialistët të jenë rreth 60 mijë vota dhe demokratët rreth 40 mijë vota. Një rezultat, që i ka dhënë 5 mandate PD dhe aleatëve dhe 7 mandate PS+PBDNJ.

Jemi përballë faktit, ku rrudhja e PD i ka siguruar një mandat LSI dhe një mandat tjetër e vë në dyshim midis PDIU dhe PR. Por, një zvogëlim i LSI, për shkak të votave që vijnë si pragmatizëm elektoral të kësaj force politike mund të çojë dhe në humbjen e mandatit, që këtë herë çon me shumë gjasa vota te socialistët, duke bërë një ndarje tjetër të votave të kampeve. Gjithçka pritet të lexohet më 25 qershor.

CityNews më tej do të sjellë edhe një analizë të disa qarqeve kryesore në vend, por edhe një rezultat përfundimtar sipas 2013 midis PD, PS, LSI dhe PDIU./CityNews