Dhuna/ Rrëfehet gazetari Elvi Fundo: Ja dyshimet e mia

9 Mars 2017, 18:58, Aktualitet CNA

Gazetari dhe drejtuesi i CityNews.al Elvi Fundo, ka rrëfyer për Report Tv dyshimet në lidhje me dhunën e ushtruar ndaj tij një ditë më parë.

Gazetari rrëfen se nuk i ka parë agresorët dhe se ata e kanë qëlluar nga mbrapa fillimisht, ndërkohë shton se kanë përdorur edhe mjete të forta.

“Jam goditur nga pas, pas koke. Nuk kam arritur t’i dalloj se kush ishin. Më kanë goditur në gojë dhe këtë e kam marrë si mesazh që mos fol më”, tha ai.

Duke rrëfyer ngjarjen, Elvi shprehet se ka besim se policia do ta zbardhë atë, ndërkohë ka theksuar se kjo ngjarje nuk duhet të politizohet.

” Po shkoja drejt një dyqani për të blerë një telefon. Tek stacioni i trenit në mes të trotuarit, dy persona më kanë goditur me mjete të forta.

Më kanë ngritur disa kalimtarë dhe kam parë dy persona që po vraponin. Kërkova që cështja të mos politizohej. Kam shumë besim që çështja do të zbardhet. Inkurajoj policinë e shtetit për ta zbardhur, jo sepse jam unë, por për cdo qytetar, pasi nuk mund të ndodhë në vitin 2017 që në mes të kryeqytetit një person të dhunohet.

Besoj se ka kamera që kanë filmuar ngjarjen. Unë e kam përkthyer si një mesazh që ti mos fol më. Por nuk po jap detaje sepse nuk dua të ndikoj në hetim” , vijoi ai

Gazetari evidentoi se ka folur me policinë për dyshimet e tij dhe se po administrohen pamjet filmike të kamerave të sigurisë të bizneseve për rreth zonës ku ndodhi incidenti.

I pyetur nga Report Tv për dyshimet e tij lidhur me urdhëruesit, Elvi Fundo jep këtë përgjigje.

“Dyshimet lidhet me shkrimet e fundit që kam publikuar në portal. Shkrimet kishin lidhje me disa trafikantë droge me emra të ndryshuar që janë pronarë mediash të lidhur me trafikun e drogës. Pra, njerëz të krimit që drejtojnë sot në politikë dhe në media. Urdhëruesit do të ishte shumë e vështirë të zbardhen, por të zbardhen agresorët në fillim. Jam goditur nga pas në mes të ditës. Unë jam gazetar që nuk fshihem, eci në këmbë nëpër Tiranë. Natën mund edhe të më kishin vrarë por të shpresojmë që policia dhe strukturat e policisë të bëjnë punën e tyre”.

Në fund, gazetari ka një falënderim për mediat, veçanërisht për Televizionin Report Tv dhe Shqiptarja.com.

“Më lejoni të bëj një falenderim për mediat. Ju falenderoj ju Report Tv dhe Shqiparja.com, falminderit për solidaritetin profesionist si gazetar“, thotë Fundo.