Trafiku i armëve të zjarrit/ Përfundon operacioni ndërkombëtar, ja rezultatet (Video)

7 Shkurt 2017, 16:25, Aktualitet CNA

Ka përfunduar operacioni ndërkombëtar i koduar ?Ditët e Përbashkëta të veprimit, JAD 2017?, kundër trafikut të armëve të zjarrit.

Në operacion morën pjesë: Shqipëria, Belgjika, Bosnja dhe Hercegovina, Bullgaria, Kroacia, Hungaria, Maqedonia, Greqia, Kosova, Mali i Zi, Holanda, Rumania, Serbia, Sllovenia, Spanja, Suedia, Zvicra, Britania e Madhe dhe SHBA (ATF – Byroja e Alkoolit, Duhanit, Armëve të Zjarrit dhe Eksplozivëve).
Nga data 27 deri më 29 Janar 2017, autoritetet ligjzbatuese nga 19 shtete së bashku me Frontex dhe Europol, u bashkuan në një operacion për të gjurmuar trafikun e armëve të zjarrit.

Gjatë një operacioni të përbashkët 3 ditor të koordinuar nga Qendra Operative e Europolit në Hagë, janë kryer kontrolle fizike, kryesisht në rajonin e Ballkanit Perëndimor.

Qendra Operative e Europolit ka qenë dëshmitare e shkëmbimit të informacionit ndërmjet autoriteteve pjesëmarrëse, lidhur me kontrollet në pikat kufitare të personave dhe automjeteve, si edhe të konfiskimeve e hetimeve të kryera. Afërsisht nga vendet pjesmarrëse janë kontrolluar 246 000 subjekte, duke përfshirë 219 000 persona dhe 14 800 automjete.

Si rezultat i këtyre veprimeve, janë konfiskuar 48 armë zjarri, si dhe 833 municione, 4 granata dore dhe rreth 500 gr. eksploziv plastik. Gjithashtu, në katër shtete është konfiskuar drogë e një sasie prej 505 kg e llojit marijuanë dhe 53 MDMA (substancë psikotropike), si edhe është parandaluar kontrabanda e mallrave të tjera si 765 pako cigare, duhan i pa përpunuar dhe një automjet i vjedhur.
Në total, janë arrestuar 58 persona në shtetet e Ballkanit Perëndimor dhe janë ndaluar të hyjnë në pikat e kalimit kufitar 127 persona. Institucionet ligjzbatuese kanë identifikuar gjashtë përpjekje për hyrje klandestine, 12 raste të qëndrimeve përtej afatit kohor si dhe 8 raste të përpjekjeve të falsifikimit të vizave/dokumentave.

Gjatë ditëve të veprimit, është shkëmbyer një sasi e konsiderueshme e informacionit në sajë të bashkëpunimit të shkëlqyshëm ndërmjet vendeve pjesëmarrëse, Frontex-it dhe Europolit. Ekspertët e Europolit kanë ofruar në kohë reale shkëmbimin e informacionit, analizën dhe përpunimin e të dhënave të mbledhura.

Oficerët e vendosur në pikat e ndryshme kufitare në Ballkanin Perëndimor janë ndihmuar nga Frontex. Ky veprim ishte pjesë e operacionit “Ditët e Përbashkëta të Veprimit ? të Ballkanit Perëndimor”, të planifikuara nën kuadrin e ?EMPACT? për armët e zjarrit./CityNews

Komunikatën e plotë, si edhe një video ilustruese mund ta gjeni në Web Link të Europolit: