Fillon ngritja e Këshillit të Emërimeve në Drejtësi

25 Janar 2017, 08:17, Aktualitet CNA

Kuvendi nis punën për ngritjen e Këshillit të Emërimeve në Drejtësi. Teksa ditët e fundit Avokati i Popullit, Gjykata e Lartë dhe prokuroria kanë përcaktuar kandidatët për Këshillin e Lartë Gjyqësor dhe Këshillin e Lartë të Prokurorisë, shumë shpejt do ngrihet dhe KED, shkruan SOT. Ky organ do të jetë i rëndësishëm pasi verifikon përmbushjen e kushteve ligjore dhe vlerëson kriteret profesionale e morale të kandidatëve për anëtarë të Gjykatës Kushtetuese dhe kandidatëve për Inspektor të Lartë të Drejtësisë.

Dje, Kuvendi ka zbardhur një udhëzim, përmes të cilit përcaktohet rruga që do të ndiqet për ngritjen e tij. Të premten, në orën 10.00, në ambientet e Kuvendit do të hidhet shorti për përzgjedhjen e anëtarëve. Sipas udhëzimit, shorti organizohet në dy kuti transparente. ?Në njërën prej kutive vendosen goglat dhe në kutinë tjetër më pas vendosen goglat në të cilat janë futur shiritat e letrës ku janë shënuar emrat e kandidatëve të propozuar nga secili institucion sipas listës së përcjellë Kuvendit të Shqipërisë. Shiritat e letrës me emrat e kandidatëve futen në gogla.

Numri i goglave duhet të përputhet me numrin e kandidatëve të propozuar nga secili institucion, sipas listës përcjellë Kuvendit të Shqipërisë?, thuhet në udhëzim. Më tej deklarohet se radha e futjes së goglave në kuti dhe radha e hedhjes së shortit përcaktohet duke u mbështetur në renditjen e mëposhtme: kandidatë të Gjykatës Kushtetuese; kandidatë të Gjykatës së Lartë; kandidatë nga Prokuroria e Përgjithshme; kandidatë nga gjykatat e Apelit; kandidatë nga zyrat e prokurorisë pranë gjykatave të Apelit; kandidatë nga gjykatat administrative. ?Përfaqësuesit e institucioneve të përcaktuara nga neni 284 i ligjit nr.115/2016 ?Për organet e qeverisjes së sistemit të drejtësisë? tërheqin nga kutia përkatëse me radhë goglat. Përfaqësuesi pasi e hap goglën, e lexon me zë të lartë emrin e kandidatit për Këshillin e Emërimeve në Drejtësi që është i shënuar në të dhe ia tregon Sekretariatit Teknik dhe të gjithë përfaqësuesve pjesëmarrës emrin. Shiriti i letrës që gjendet brenda saj, i dorëzohet Sekretariatit Teknik. Kandidati, emri i të cilit është shënuar në shiritin e letrës, do të jetë anëtari i Këshillit të Emërimeve në Drejtësi?, theksohet në udhëzim.