E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Instat/ Papunësia ulet me 0,8% në 3-mujorin e tretë

12 Dhjetor 2016, 14:06, Aktualitet CNA

Në tremujorin e tretë 2016, shkalla zyrtare e papunësisë në Shqipëri është 14,7 %e matur nëpërmjet një ankete të posaçme. Krahasuar me tremujorin e dytë 2016 papunësia u ul me 0,8 pikë përqindje, ndërsa krahasuar me tremujorin e tretë të vitit 2015, shkalla zyrtare e papunësisë u ul me 2,5 pikë përqindje, raportoi sot INSTAT.
Instituti i Statistikës verifikoi se ritmi i rritjes së punësimit sipas sektorëve kryesorë të ekonomisë, nga tremujori i dytë 2016 në tremujorin e tretë 2016 është: 5,1 % në sektorin e industrisë, 2,5 % në sektorin e shërbimeve dhe 2,3 % në sektorin e bujqësisë.
Në tremujorin e tretë 2016, shkalla e punësimit është 57,1 %. Punësimi gjatë këtij tremujori shfaq një tendencë në rritje si në terma vjetorë, ashtu dhe në terma tremujorë. Krahasuar me të njëjtin tremujor të vitit 2015, punësimi u rrit me 8,5 %. Krahasuar me tremujorin e dytë të këtij viti punësimi u rrit me 2,9 %.
Për femrat, shkalla e pjesëmarrjes në forcat e punës është 59,2 %, ndërsa për meshkujt ky tregues është 75,3 %. Për meshkujt, shkalla e pjesëmarrjes në forcat e punës është 16,1 pikë përqindje më e lartë sesa për femrat. Krahasuar me të njëjtin tremujor të vitit 2015, shkalla e pjesëmarrjes në forcat e punës për femrat është rritur me 4,5 pikë përqindje, ndërsa për meshkujt me 0,9 pikë përqindje.
Shkalla e punësimit për meshkujt është 64,3 %, ndërsa për femrat 50,8 %. Krahasuar me të njëjtin tremujor të vitit 2015, shkalla e punësimit për meshkujt është rritur me 2,9 pikë përqindje, ndërsa për femrat rritja është me 5,8 pikë përqindje.
Shkalla zyrtare e papunësisë për meshkujt është 15,3 % dhe për femrat është 14,0 %. Shkalla e papunësisë për femrat është 1,3 pikë përqindje më e ulët sesa për meshkujt. Krahasuar me të njëjtin tremujor të vitit 2015, shkalla e papunësisë për meshkujt ka rënë me 1,7 pikë përqindje dhe për femrat ka rënë me 3,5 pikë përqindje.
Gjatë tremujorit të tretë të vitit 2016, shkalla e pjesëmarrjes në forcat e punës për të rinjtë e moshës 15- 29 vjeç është 46,1 %. Shkalla e punësimit të të rinjve është 33,5 %. Shkalla zyrtare e papunësisë për të rinjtë është 27,4 %. Shkalla e papunësisë për të rinjtë ka pësuar një rënie prej 2,5 pikë përqindje, krahasuar me tremujorin pararendës.
Edhe në terma vjetorë shkalla e papunësisë së të rinjve shfaq tendencë në rënie. Krahasuar me tremujorin e tretë të vitit 2015, shkalla e papunësisë për të rinjtë në tremujorin e tretë të vitit 2016 është 4,9 pikë përqindje më e ulët. Për popullsinë 30-64 vjeç, në tremujorin e tretë 2016, shkalla e pjesëmarrjes në forcat e punës është 77,5 %, ndërsa shkalla e punësimit është 68,5 %. Shkalla e papunësisë për këtë grup-moshë është 11,7 %.
Krahasuar me tremujorin pararendës për këtë grup-moshë pati një rënie të lehtë të shkallës së papunësisë me 0,2 pikë përqindje. Edhe në terma vjetorë ky tregues pësoi një rënie të lehtë me 1,2 pikë përqindje.