web counter
LEXO PA REKLAMA!

SHKARKO APP

App Store
Google Play

E fundit!

x

Tatimet, kontroll në mbi 6600 biznese/Fushata sensibilizuese vazhdon deri në fund të muajit

17 Gusht 2016, 15:43, Aktualitet CNA

Në dy javët e para të Gushtit janë kontrolluar nga administrate tatimore rreth 6600 biznese në të gjithë vendin në kuadër të fushatës sensibilizuese për kuponin tatimor. Kryesisht kontrollet janë shtrirë në zonat turistike, atje ku ka një dyndje të pushuesve për shkak të sezonit turistik veror.

Aksioni i tatimorëve nisi më 1 Gusht, por qëllimi i tij nuk ishte aplikimi i masave administrative ndaj bizneseve, por sensibilizimi i tyre për të respektuar ligjet. Referuar shifrave nga kontrollet e ushtruara kanë rezultuar problem në rreth 800 subjekte, në të cilët ka rezultuar mos vënia në punë e kasës ose mosdhënia e kuponit tatimor.

Por drejtues të Tatimeve theksojnë se në asnjë rast të tillë nuk janë aplikuar masa administrative ndaj subjekteve por vetëm ndërgjegjësim i tyre.

Sipas të dhënave nga Tatimet, rezulton se në këtë periudhë të vitit ka një dyfishim të kuponave tatimorë të lëshuar në krahasim me një vit më parë, çka duket se ka kënaqur administratën tatimore.

Fushata sensibilizuese ndaj bizneseve do të vijojë deri në fund të muajit, ndërsa paralajmërohet se në Shtator do të nisë një tjetër fushatë, këtë rradhë me një zbatim të ligjit, duke aplikuar edhe masat administrative sipas shkeljeve që do të konstatohen.

Burimet nga tatimet bëjnë me dije se për të gjitha bizneset që në këtë kontroll ka rezultuar se nuk kanë dhënë kuponin tatimor do të monitorohen, por për këtë nuk do të ketë një grafik. Pra kontrollet e ardhshme mund të jenë të befasishme, pa ndonjë datë të përcaktuar. Sipas burimeve kontrollet kanë përfshirë bizneset e mëdha dhe të mesme.

/citynews/





Lajmet e fundit nga