E fundit!

11:38 Aktualitet

Rrëshqitje dheu në Kodër Currila/ Rrezikohet pallati

Rrëshqitje dheu janë regjistruar në Kodër Currila në orët ...

Zgjedhjet në Dibër betejë Rama-Meta/Ja kandidatët

10 Gusht 2016, 08:06, Aktualitet CNA

Kandidatëve për bashkinë e Dibrës nuk i ka mbetur shumë kohë për fushatë ndërsa lufta për emrat ka sjellë përplasjen e rradhës Rama-Meta. Së fundi janë zbardhur dhe emrat paraprakë për këtë garë.

Partia Socialiste mund të kandidojë Muharrem Rama, kryetar i PS-së Dibër dhe Donika Hysenaj ish-prefekte e komanduar e Dibrës. PS nxjerr në garë kandidaturën e një gruaje për të bërë të harruar skandalin e parardhësit në detyrë. Një tjetër kandidat i mundshëm është Dionis Imeri, drejtori aktual i Tatimeve i dërguar në Dibër nga kryeqyteti pak kohë më parë.

Nga ana tjetër LSI del me kandidaturën e Hajri Laçit, aktualisht mban detyrën e kryetarit të Qarkut Dibër. Ilir Meta paraqet kandidat alternativ në këtë garë duke kërkuar të marrë nën kontroll Dibrën, por kryeministri i vendit duket i bindur se kjo bashki i takon PS-së.

Ilir Meta me Dibrën kërkon të ketë një tjetër bashki nën administrim dhe duke i kërkuar mbështetjen Ramës ai po përpiqet të marrë edhe një lloj dëmshpërblimi nga Partia Socialiste, pas humbjes së disa bashkive të LSI nga sabotimet e socialistëve në bazë, siç ishin Lezha, Kukësi, Pogradeci apo Vora. Këto bashki në zgjedhjet lokale u fituan nga PD dhe Meta në atë kohë akuzoi socialistët për flirt me demokratët.

Beteja Rama-Meta, nuk është vetëm në qendër dhe për poste ministrore, ajo tani ka zbritur në bazë. Nga ana e tij Meta mendon se kandidati i tij është më i fortë e më serioz dhe nuk ka mbi supe peshën e skandalit seksual të Shukri Xhelilit, ish kreut të bashkisë Dibër, nga rradhët e PS-së. Në këtë linjë LSI mendon se kushdo të kandidojë nga PS do humbë për të shkuarën e saj të afërt me video skandalin që rrëzoi ish kreun e bashkisë Dibër i cili ndodhet ende në burg.

Nxjerrja e kandidatit të Metës mendohet të jetë lojë për koalicionin dhe gjasat janë që të çojë ujë në mullirin e PD-së në këtë përballje, por fitorja e opozitës do të jetë jo pa vështirësi megjithë daljen e kandidatëve nga të dy partitë e mazhorancës. Përplasja Rama Meta, përplasjet PS-LSI në bazë dhe skandali seksual i Shukri Xhelilit, janë një favor për opozitën, e cila ka shanset më të mëdha për të fituar Bashkinë e Dibrës, kuptohet edhe me ndihmën e Ilir Metës dhe LSI-së.

Partia Demokratike ka dhjetëra kandidatë në garë të cilët pritet të rivalizojnë fort me socialistët dhe të jenë një hap përpara tyre megjithëse PS-ja është në pushtet. Kandidaturat e mëposhtme janë më të mundshmet që pritet të garojnë përballë kandidatit socialist. Disa nga kandidaturat janë Albert Kojku, Naim Gazidede ish kreu i PD-së Dibër, Rrahim Kaleci Kryetar i PD-së Dibër, ish deputet, Shkëlzen Gjoka sekretar i degës të PD në Dibër, Xhemal Gjunkshi me ish-shefi i Shtabit të Përgjithshëm të Forcave të Armatosura. Një emër tjetër që pretendon të garojë është edhe Ilir Krosi ish-kryebashkiaku i Peshkopisë i cili në zgjedhjet e qershorit 2015 humbi garën me një diferencë të vogël votash dhe për shkak të përplasjeve të brendshme në PD dhe kandidaturave të pavarura të dala nga brenda opozitës./Citynews