Vettingu/4 formularët që duhet të plotësojnë Gjyqtarët dhe Prokurorët

28 Korrik 2016, 14:17, Aktualitet CNA

Gjyqtarët dhe Prokurorët do të duhet të plotësojnë 4 formularë përsa I takon atij që quhet procesi I Vettingut, që përfshin skanimin e anëtarëve të sistemit të drejtësisë. Pothuajse është e njëjta procedurë si në rastin e ligjit për dekriminalizimin, ku subjektet e ligjit, duhet të vetëdeklarojnë në formularë të posaçëm të dhënat e tyre, veprimtarinë, pasurinë etj.

Edhe në rastin e Vettingut, gjyqtarët dhe prokurorët do të duhet të plotësojnë 4 formularë, nga të cilët 3 janë të domosdoshëm, ndërsa I 4-ti përfshin vetëm ata gjyqtarë dhe prokurorë të cilët do të konkurojnë në një nga 21 vendet në organet që kalojnë në radiografi morale dhe profesionale, pjesën tjetër të sistemit të drejtësisë.

Formulari i parë është ai për deklarimin e pasurisë, i cili autorizon institucionet vendasve dhe vëzhguesit ndërkombëtarë të verifikojnë çdo të dhënë pasurie të tij apo familjarëve. Çdo deklarim i pavërtetë, ashtu si me rastin e dekriminalizimit, përbën vepër penale dhe dënohesh me burg.

Formulari I dytë është ai për kontrollin e figurës, dhe synon evidentimin dhe përjashtimin nga sistemi të çdo funksionari të lidhur apo nën ndikim të krimit organizuar.

Formulari i tretë lidhet me aftësinë profesionale, ku gjyqtarët dhe prokurorët duhet të japin të dhëna dhe sqarime për çdo çështje që kanë gjykuar dhe hetuar në 3 vitet e fundit.

Formulari i katërt, nuk është i detyrueshëm për të gjithë sistemin e drejtësisë por për kandidatët që synojnë një nga 21 vendet në organet që do të kalojnë në radiografi morale dhe profesinale të gjithë sistemin e drejtësisë në vend.

Permes këtij dokumenti në formën e një deklarate, zyrtari dorëzon privatësinë tek Byroja Kombëtare e Hetimit, ndërsa pranon që në rast se zgjidhet si funskionarë t?i kontrollohet çdo komunikim telefonik apo elektronik.

Krahas formularëve shtesë, ligji për rivlerësimin e gjyqtarëve dhe prokurorëve, sjell disa dispozita mjaft të rrepta, i tillë është neni 34 që lidhet me standardet e kontrollit të figurës, ndërsa cilëson si rrethanë ndaluese dhe kur subjekti i rivlerësimit është fotografuar, ose kur një dëshmitar përshkruan një takim me një person të përfshirë në krimin e organizuar.

Gjithashtu kur subjekti i rivlerësimit ose personi i lidhur me të ka pasur një komunikim me një person të përfshirë në krimin e organizuar, apo ku subjekti i rivlerësimit merr pjesë në takime, aktivitete, ose raste të tjera, me një ose më shumë persona të përfshirë në krimin e organizuar. /citynews/