Arrest me burg për 5 të arrestuarit pas grabitjes në Rinas/Zbardhen detaje të reja mbi ngjarjen

4 Korrik 2016, 15:04, Aktualitet CNA

Grupi hetimor që po heton mbi grabitjen spektakolare të kryer më 30 Qershor në pistën e aeroportit ndërkombëtar ?Nënë Tereza? në Tiranë duket se ka zbardhur detaje të tjera mbi çështjen në fjalë. Nga hetimet e deritanishme rezulton se punonjësi i bankës, i cili ishte ngarkuar për transferimin e thasëve me para, Kujtim Picari, në momentin që ka ndodhur ngjarja ka qenë i vetëm në furgonin e transportit të parave.

Burimet bëjnë me dije se dy nga punonjësit e kompanisë së sigurisë fizike ?Nazeri 2000? nuk kanë pasur çertifikatat e sigurisë, por edhe as dokumentet që të provonin se ishin punonjës të kësaj kompanie.

Kjo ka qenë arsyeja që punonjësit e shoqërisë private të sigurisë nuk janë lejuar që të hyjnë në pistën e aeroportit, ndërsa punonjësi i bankës ka drejtuar i vetëm automjetin drejt pistës së aeroportit. Ky është momenti kur ka ndodhur edhe grabitja, kur punonjësi i bankës është ndeshur me grabitësit e armatosur në momentin që ka hapur dyert e makinës.

Ndërkohë, Gjykata e Krujës ka vendosur masën e sigurisë ?arrest me burg? për 5 të arrestuarit pas ngjarjes në Rinas, ku persona të armatosur dhe të maskuar grabitën një sasi të konsiderueshme valute në pistën e aeroportit. Masat për Kujtim Picarin, shoqëruesi i vlerave monetare i një banke të nivelit të dytë dhe Vangjel Nikollën drejtor i shërbimeve aeropotuale në Rinas u shqyrtuan nga gjyqtarja Enkeljeda Hoxha, e cila vendosi masën ?arrest me burg? pas kërkesës së prokurorit të çështjes.

Gjatë seancës, të pandehurit nuk i kanë pranuar akuzat për shpërdorim detyre, ndërsa avokatët e tyre janë shprehur jashtë seancës se përgjegjësia për ngjarjen nuk është e tyre pasi ata nuk kanë kryer asnjë shkelje.

Ndërkohë për shefin e stacionit të Kompanisë ICTS Arben Karafili si dhe dy agjentët e sigurisë së kompanisë Fadil Jonuzaj e Bledar Bollshmi masat janë shqyrtuar nga një tjetër gjyqtare. Vendimi u mor pasi gjyqtarja Enkeljeda Hoxha u tërhoq për shkak të konfliktit të interesit me avokatin që i mbronte.

Burime nga grupi hetimor bëjnë me dije se nga verifikimet e deritanishme ka dyshime se kemi të bëjmë me të njëjtin grup që kanë kryer dhe më parë grabitje të kësaj natyre, kryesisht të vlerave monetare të bankave të destinuara për tu larguar jashtë vendit.