Veliaj fundos Tahirin për përgjimet/ Kamerat e bashkisë zbulojnë lëvizjet e makinës ku ndodhej aparatura

10 Qershor 2016, 06:58, Aktualitet CNA

Skandali i përgjimeve të paligjshme që ka shpërthyer në vend ditët e fundit, ka nxjerrë në pah edhe një konflikt tjetër, atë mes Erion Veliajt dhe Saimir Tahirit. Rivalitetit i tyre për kreun e PS-së është i njohur tashmë, por Veliaj i ka dhënë një goditje të fortë duke i rënduar edhe më shumë pozitat e Saimir Tahirit.

Kryetari i Bashkisë së Tiranës ka vënë në dispozicion të prokurorisë menjëherë pamjet filmike të kamerave të sigurisë së Bashkisë së Tiranës të datës 13 maj, rreth orës 12:00, ku është identifikuar makina në të cilën ndodhej pajisja e përgjimit që kalon në rrugën ku ndodhet reparti i Forcave të Posaçme Operacionale, shkruan “Sot”. Këto pamje janë fiksuar pikërisht kur oficerët e policisë kanë shkuar për të sekuestruar makinën ku ndodhej pajisja. Por, ajo është larguar nga ambientet 10 minuta pasi hetuesit kanë shkuar në ndërtesë dhe ishin në pritje të drejtorit të përgjithshëm të Policisë së Shtetit, Haki Çako, që të firmoste sekuestrimin.

Pamjet e kamerave të sigurisë së Bashkisë së Tiranës janë një provë mbështetëse e asaj që tregohet në librin e hyrje-daljeve, edhe kjo sekuestruar tashmë nga Prokuroria. Ndonëse ligji e detyron bashkinë të vërë në dispozicion të prokurorisë pamjet filmike të kamerave të sigurisë, ajo që bën përshtypje është gatishmëria e Veliajt, i cili ka shfrytëzuar rastin duke i dhënë një goditje Saimir Tahirit. Tashmë është konfirmuar që me pajisjen janë kryer përgjime të paligjshme dhe Veliaj dyshon se edhe ai mund të jetë përgjuar nga Tahiri, i cili e sheh si rival në PS, që në momentin që Erion Veliaj mori drejtimin e Bashkisë së Tiranës.

Pavarësisht pretendimit të drejtuesve të repartit të forcave të posaçme se kamerat e sigurisë nuk punojnë, mësohet se hetuesit e prokurorisë kanë sekuestruar serverin pasi dyshohet se është ndërhyrë për fshirjen e tyre. Ky repart, është nga më të monitoruarit pasi agjentët e tyre, merren me vëzhgimin, ndjekjen, arrestimin e personave të kërkuar dhe që janë trajnuar sipas policisë me aparaturën e përgjimit ?IMSI Catcher?.