Skena politike shqiptare tani është 4 polare/ Nga Elvi FUNDO

19 Prill 2016, 12:53, Aktualitet CNA

Ka qenë ish-kryeministri, Sali Berisha, ai që ka artikuluar para disa vitesh se skena politike ishte 3 polare. Kjo, menjëherë pas daljes së Ilir Metës jashtë Partisë Socialiste dhe krijimit të LSI.

Në fakt, po të shohësh veprimet dhe ngjarjet politike të sotme në Shqipëri, lehtësisht kuptohet se skena politike shqiptare, tashmë nuk ka më vetëm tre, por 4 faktorë politikë.

Partia Socialiste, Partia Demokratike, LSI dhe faktori i katërt që funksionon thuajse si një pol politik më vetë është ish-kryeministri i vendit Sali Berisha.

Partia Socialiste është poli i parë, LSI është i trete, por i dalë nga PS. Në fakt poli i dytë në radhë është Partia Demokratike, e cila sot drejtohet nga Lulzim Basha, por që duket të jetë shumë herë më e dobët se sa partia që drejtonte ish-kryeministri Berisha kur ishte në opozitë, i cili ka një formë tjetër sjelljeje dhe veprimi në politikë. Kreu aktual i PD, Lulzim Basha nuk ka aksionin dhe vendosmërinë e Berishës dhe ende nuk ka fituar besimin tek opinioni publik, por edhe tek faktorët politik në vend.

Kjo mefshtësi e Lulzim Bashës ka lënë një hapësirë të madhe në kampin opozitar. Nuk kanë mundur dot të përfitojnë as partitë e vogla opozitare, por me sa duket poli i vetëm për të mbushur cdo hapësirë boshe të lënë nga Basha është Sali Berisha.

Tashmë duket qartë diferenca e madhe e aksionit të Berishës dhe atij zyrtar të Partisë Demokratike. Ka një diferencë të thellë midis artikulimeve të Bashës dhe aksionit të fortë ?dhëmbë për dhëmbë? të ish- kryeministrit Berisha në parlament. Konferencat e tij të shtypit, artikulimet në parlament, prononcimet? e tij, janë ?bomba? në krahasim me politikën dhe artikulimet e Bashës. Berisha është i drejtpërdrejtë, ballor në argumente dhe sulme qartësisht politike. Qytetari i tij dixhital dhe denoncimet e tij janë më të rëndësishme për qeverinë se sa qëndrimet e Lulzim Bashës.

Edi Rama dhe Ilir Meta, në distancë duken se duan një marrëveshje me Sali Berishën, më shumë se sa një marrëveshje politike me Bashën. Qëndrimet e kreut aktual Lulzim Basha, janë ?as mish as peshk?, ndërsa ato të Berishës, historikisht është treguar se kanë qenë reale dhe jo si pasojë e kulisash.

Denoncimet për avionët me drogë, korrupsioni në shëndetësi, krimin politik në parlament, bandat dhe kriminelët e lidhur me pushtetin dhe gjithçka tjetër Berisha artikulon cdo ditë, janë argumente që tregojnë se ish kreu i qeverisë funksionon si një pol më vetë në politikë. Ai nuk është ndarë nga Partia Demokratike, por vepron ndryshe nga qëndrimet dhe veprimet e Lulzim Bashës duke treguar se e ka lënë pasardhësin e tij të ecë me këmbët e veta në politikë. Kur gabon Basha një ?shpullë? e Berishës nuk mjafton, por shërben si leksion i radhës për kreun e PD. Prej gati tre vitesh në opozitë, Berisha duket të funksionojë si një pol më vete, ndoshta edhe i mërzitur dhe i pakënaqur nga Lulzim Basha dhe drejtuesit aktualë të Partisë Demokratike.

Tashmë skena politike ka katër pole, Ramën, Metën, Bashën dhe Berishën. Ky i fundit, një lider i lindur për një opozitë të fortë dhe aktive. ?Qurrashët? rreth Lulzim Bashës kurrsesi nuk mund të bëjnë opozitën që bën ish-kryeministri i vendit dhe pse më shumë se sa opozitë ata janë kthyer në qaramanë dhe grindavecë politikë./citynews