BSH ul normën bazë në 1.5%, Sejko: Sektori financiar shqiptar jo i përfshirë në skandalin e Panama Papers

6 Prill 2016, 14:48, Aktualitet CNA

Banka e Shqipërisë ka ulur normën bazë me 0.25 pikë përqindjeje, duke e zbritur atë në një tjetër nivel historik prej 1.5%. Kjo është hera e 15 që institucioni qendror ul normën bazë, që nga shtatori 2011, kur filloi një politikë agresive të lehtësimit monetar.

Përmes kësaj lëvizjeje Banka e Shqipërisë synon të ulë koston e parasë në ekonomi, duke i bërë kreditë më të lira dhe nxitur sipërmarrjet të investojnë e individët të blejnë, ndërkohë që kursimtarët nuk janë të interesuar të mbajnë më paratë në banka për shkak të interesit të ulët.

Pavarësisht uljes së vazhdueshme të normës bazë, kredia në vitin 2015 ishte e dobët, duke rënë neto (përjashtuar fshirjen e kredisë së keqe) me 1.4% me bazë vjetore, ndërkohë që në kahun tjetër dalja e depozitave nga bankat (rreth 220 milionë euro janë reduktuar depozitat me afat në lekë në 2015-n) nuk ka dhënë efekt në rritjen e konsumit, që mbetet i dobët.

Kërkesa për kredi nga bizneset, sidomos sipërmarrjet e mëdha, mbetet e dobët, për arsyet të tjera përveç kostos së huasë, që gjithsesi është reduktuar vitet e fundit, duke arritur mesatarisht në rreth 8% në lekë, nga 14-15% që ishte përpara se të fillonte lehtësimi monetar.

? Do të monitojmë situatën më tej dhe shprehim gaditshmërinë që të ndërmarrim lehtësime të tjera në rast se goditjet deflacioniste do të prekin më tej konsumin?- tha guvernatori Sejko.

Kjo vendimarrje e Këshillit Mbikëqyrës së BSH, sipas tyre, pritet që të nxisë më tej kreditimin, konsumin si dhe investimet.

Guvernatori Sejko, nga ana tjetër, ka njoftuar një tjetër vendim të marrë sot, norma e interesit të depozitës njëditore në Bankën e Shqipërisë të jetë në nivelin 0.25%, dhe norma e interesit të kredisë njëditore në Bankën e Shqipërisë të jetë në nivelin 2.75.

Në vijim të fjalës së tij, Guvernatori tregoi se politika fiskale e ndërmarrë nga Banka e Shqipërisë ka pasur ecuri pozitive dhe se do të mbetet konsoliduese.

Sipas tij, BSH gjykon se përmirësimi i legjislacionit për kreditë e këqija dhe ekzekutimin e kolateralit do përmirësojë më tej aktivitetin bankar. Primet e likuiditetit janë në rënie, ka cituar Guvernatori, ndërsa aktiviteti bankar sipas tij do të vijojë të përmirësohet nga heqja e kredive me probleme nga portofolet e tyre. Guvernatori ka përmendur edhe ecurinë e eksporteve, që sipas tij, ulja e tyre ndikohet nga ambienti i jashtëm i pafavorshëm si ulja e çmimeve të naftës.

I pyetur për skandalin e ?Panama Papers? dhe për rolin që duhet të ketë BSH për kontrollin e kompanive të përfshira shqiptare, guvernatori Sejko deklaroi se nuk është i sigurt nëse kanë dal emra konkretë dhe duhet parë çdo çështje në këndvështrim ligjor dhe të ndiqet nga Prokuroria, në rast se ka informacion të faktuar.

?Banka e Shqipërisë ka qenë gjithnjë kundër çdo situate informaliteti dhe ushtron aktivitet kontrollues. Nuk kemi informacion që sektori financiar shqiptar të jetë i përfshirë në një skandal të tillë, kemi çdo pasqyrë financiare të tyret dhe të klientëve të tyre?.- deklaroi Guvernatori i BSH./monitor.al