Dekriminalizimi/ Bylykbashi: Mazhoranca, tentativë për mbrojtje të kriminelëve

3 Mars 2016, 10:08, Aktualitet CNA

Deputeti i Partisë Demokratike, Oerd Bylykbashi ka deklaruar se mazhoranca po shpreh hapur tentativën e saj për mbrojtjen e krimineleve, duke mos ofruar konsunsus për miratimin e akteve nënligjore të ligjit për dekriminalizimin.

Në një prononcim për mediat, deputeti demokrat tha se formulari i propozuar nga Partia Socialiste, që do të plotësohet nga deputetët, synon mbrojtjen e tyre. ?PS, nëpërmjet formularit të saj kërkon të shpetojë kriminelët. Formulari po përdoret si instrument për të shmangur zbatimin e ligjit?, u shpreh deputeti Bylykbashi. Ai theksoi se ka përpjekje të mazhorancës që konsensusi i 17 dhjetorit të prishet. Ndërkaq pak momente para deklaratës së deputetit demokrat, ishte Kreu i grupit parlamentar të LSI-së, Petrit Vasili , i cili deklaroi se do të shkohet drejt një konsensusi të ri lidhur me ligjin e dekriminalizimit.

Deklarata e plotë e deputetit Oerd Bylykbashi

Ajo që po ndodh, deri mbrëmë por vazhdon dhe sot, janë përpjekje të mazhorancës që konsensusi i 21 Dhjetorit të prishet. Eshtë detyrim i Parlamentit të miratojë pikë për pikë atë që kërkon ligji dhe pikë për pikë jo vetëm gërmat, por dhe frymën e ligjit. Formulari i vetëdeklarimit që ofron PD i jep mundësinë Ligjit të dekriminalizimit që të zbatohet plotësisht. Ajo që kërkon PS është që nëpërmjet formularit të propozuar prej saj, të cungojë thelbësisht mundësinë e prokurorisë dhe organeve kompetente që të kërkojnë çdo të dhënë, të hetojnë çdo të dhënë të personave që kanë rekorde kriminale dhe qëllimi është vetëm një, që kriminelët që janë sot në politike dhe në administratë të shpëtojnë dhe në të ardhmen të kenë mundësinë përsëri të përsërisin atë që kanë bërë nga viti 2013 e këtej. Ne nuk pranojmë në asnjë rast që nëpërmjet një instrumenti si formulari që paraqet PS, kriminelët të kenë rastin përsëri të livadhisin në politikë apo administratë. E vetmja mundësi është që duke pranuar formularin që ofron PD i cili është plotëisht në përputhje me ekspertizën më të mirë të ofruar nga ekspertët e FBI dhe që zbaton jo vetëm në germë, por ligjit të dekriminalizimit i jep mundësinë të marrë dhe të shoshisë çdo lloj të dhëne me karakter penal që kanë politikanët, drejtuesit e lartë apo administrate, dhe kush gjendet më pas në kushtet e ndalimit të ligjit të largohet.

Formulari është vetëm instrumenti që do të mbledhë të dhëna nuk është instrumenti për zbatimin e ligjit siç kërkon ta qasë mazhoranca. Formulari është kurthi, ku kriminelët duhet të ngecin dhe jo të përdoret si instrumenti për tu shmangur nga zbatimi i ligjit. Këtë kanë bërë deri dje në darkë, sot mbetet akoma dhe pak hapësirë për ta parë nëse mazhoranca do të tërhiqet.

Mos harroni që dje qe një tentativë e turpshme nëpërmjet një instrumenti të përdorur nga stafi i Kuvendit për ta quajtur ligjin antikushtetues, tentativë e pastër për të rrënuar zbatimin e ligjit, për ta vonuar atë. Por gjithashtu, një gjë me shumë rëndësi është që nëse ne nuk i japim zgjidhje fenomenit që deputeti Prenga ilustron, pra duke pranuar Parlamenti amendamentin e PD, kjo kategori e rrezikshme duhet të largohet nëpërmjet ligjit të dekriminalizimit pra vetëm me ligj dhe jo me vullnete individuale, sigurisht atëherë nuk kemi zgjidhje. Pra të dyja janë shumë të rëndësishme: miratimi i amendamente që kërkojmë ne dhe nga ana tjetër zbatimi i plotë pa asnjë lloj shtegu të lirë për kriminelët i ligjit të dekriminalizimit. Kjo arrihet duke pranuar proprozimin e detajuar që ka ofruar PD. Çdo lloj tentative tjetër është zvarritje dhe minim i ligjit. Nuk ka asnjë hapësire tjetër. Po ju them nëse vazhdohet me atë që u bë dje, sigurisht që nuk do të kemi asnjë lloj zgjidhje. Ajo që ndodhi dje është vetëm një zvarritje për të marrë kohë por kohë nuk ka më.