Nga Mero Baze/ Ngushtimi i rrethit “antireformë”

8 Janar 2016, 20:23, Opinione CNA

Takimi i sotëm në mesditë në zyrat e Kuvendit të Shqipërisë, arriti të paraqesë dy palë të qarta në këtë histori. Njëra palë është Komisioni i Ekspertëve me draftin e tij, që mbrohet nga Shtetet e Bashkuara të Amerikës, Bashkimi Evropian dhe shumica parlamentare në vend, ku përfshihen PS dhe LSI, si dhe pala tjetër Partia Demokratike, e cila u gjend e papërgatitur për këtë rezultat të dy ambasadorëve, dhe ka shtyrë për nesër rekomandimet e ekspertizës së saj.

Shpresat që kishte Partia Demokratike të maskonte kundërshtimin e saj për reformën, ishin mbështetur tek diversioni politik mes PS dhe LSI, që Berisha po e ushqente prej javësh dhe tek skema e zhbërjes së draftit të ekspertëve të SHBA, BE dhe atyre shqiptarë, përmes rifllimit të procesit me një tyreze politike.

Berisha, ashu siç pritej, përdori rekomandimet e Komisionit të Venecias për ta kundërshtuar procesin, por dy ambasadorët e Perëndimit që po e udhëheqin me durim këtë proces, po përdorin pikërisht këto rekomandime për t?i përfshirë në proces opozitarët, ose për t?i identifikuar ata si bllokues të reformës.

Një tjetër taktikë e lodhshme e Partisë Demokratike, ishte injorimi i deklaratave publike të ambasadorit Lu, përfshi dhe kartolinën e tij për Vit të Ri, ku shprehej qartë se ?Shtetet e Bashkuara të Amerikës qëndrojnë pas draftit të reformës dhe e mbështesin atë plotësisht?. Edhe pse kjo deklaratë u bë disa herë publike, me zë, figurë dhe shkrim prej zotit Lu, retorika e derisotme e njerëzve të PD, vazhdon të flasë për një draft të Partisë Socialiste. Kjo është një mënyrë për të lodhur ambasadorin e SHBA dhe për të dekurajuar atë, të vazhdojë të ushtrojë presion për këtë çështje.

Që Partia Demokratike ka vërejtje për draftin kjo është e qartë dhe legjitime, por ajo duhet të ketë guximin ta bëjë betejën me autorët e draftit dhe jo me mullinjtë e erës. Sali Berisha është shquar për guximin e tij kundër thuajse gjithë ambasadorëve amerikanë që kanë qenë në Shqipëri, që i kanë rrezikuar pushtetin dhe nuk u bë qameti të sulmojë dhe zotin Lu, nëse mendon se ka bërë një draft kundër interesave të tij. Loja me maska që ai dhe Basha bëjnë me ambasadorin, që tjetër gjë i thonë atij në zyrë dhe të tjera fjalë i dërgojnë përmes Bylykbashit dhe Alibeajt, fyen dyfish jo vetëm inteligjencën e diplomatëve, por dhe profilin e të dërguarve të tij, të cilët po i degradon edhe si ekspertë, për të cilën ata kanë vlera reale dhe si politikanë.

Sot ky proces është qartësuar dhe kemi një bashkim qëndrimesh të diplomatëve perëndimorë të BE dhe SHBA për reformën, PS, LSI dhe një ?djegie? të skemës së PD, për ta përdorur reformën si pykë për të çarë shumicën dhe jo si një përpjekje serioze për ta bërë atë. Tani axhenda e saj kryesore antireformë është djegur.

Prej sot në orën 5 mbasdite, kishin shans të përfshiheshin në procesin pro reformës, por meqë nuk janë të përgatitur, pasi nuk kanë pasur ndërmend reformën, por përçarjen e shumicës përmes reformës, e shtynë papritur për nesër ofertën e ekspertizës së tyre rreth rekomandimeve të Venecias. Ky është një proces i mundimshëm për ta, pasi tani do t?u duhet të duken sikur janë marrë dhe me përmbajten e reformës dhe duke qenë se janë të pasigurt, të papërgatitur dhe të paqartë se çfarë mendon realisht Berisha për këtë, ata nuk kanë për t?i lexuar asnjëherë njësoj rekomandimet e Venecias, siç i lexon SHBA, BE, dhe dy partitë e shumciës PS dhe LSI, të cilat tani mbrojnë një draft të përbashkët të përmirësuar.

Problemi që ka PD tani, nuk është përmbajtja e reformës, pasi ajo ndahet në shumë pak pika nga drafti për këtë çështje. Problemi i saj është se ajo dështoi të bënte politikë me reformën dhe tani reforma po bën politikë me fatin e saj.