web counter
LEXO PA REKLAMA!

SHKARKO APP

App Store
Google Play

E fundit!

x

Mosmarrëveshje PS-LSI për dosjet e Sigurimit/ Rama shtyn votimin e kandidates Gentiana Sula, nuk ka numrat

30 Tetor 2015, 08:15, Aktualitet CNA

Mosmarrëveshje mes Partisë Socialiste dhe Lëvizjes Socialiste për Integrim për konstituimin e Autoritetit për Hapjen e Dosjeve të ish-Sigurimit të Shtetit. Kryeministri Edi Rama ka vijuar të shtyjë hedhjen në votim të kandidaturës Gentiana Sula, e propozuar nga Këshilli i Ministrave, si anëtare e komisionit që do të hapë dosjet. Shtyrja duket se ka ardhur pas pasigurisë së kryeministrit sa i takon numrave të domosdoshëm për të votuar kandidaten. Ndërkaq, pasiguria e kryeministrit vjen pas kërkesës së Spartak Brahos në Konferencën e Kryetarëve, që kandidatura në fjalë të shqyrtohej edhe në Komisionin e Sigurisë Kombëtare. Nga ana tjetër, kreu i grupit parlamentar socialist, Gramoz Ruçi, e ka refuzuar këtë kërkesë duke pohuar se shqyrtimi i kandidaturës është ekskluzivitet vetëm i Komisionit të Ligjeve. Kandidatura e zonjës Sula, u miratua në Komisionin parlamentar të Ligjeve më 12 tetor si dhe u deklarua që shumë shpejt ajo do të kalonte në seancë plenare për miratim. Edhe pse deri më tani kanë kaluar tre seanca, konkretisht më 15, 22 dhe 29 tetor, kandidatura e zonjës Sula nuk u hodh fare në votim. Pritej që dhe dje të ndodhte një gjë e tillë, por nuk ishte përfshirë fare në rend të ditës. Që kur ka filluar sesioni i ri parlamentar, mazhoranca qeverisëse ka humbur shumë terren, pasi mjaft ligje janë miratuar me numër minimal votash. Si duket edhe zgjedhja e anëtarëve për Autoritetin e Hapjes së Dosjeve të Sigurimit po vijon të zvarritet për shkak të përplasjeve brenda koalicionit të majtë.

Zvarritja  

Procesi i hapjes së dosjeve të Sigurimit të Shtetit duhej të kishte nisur që kohë më parë, sipas parashikimeve në ligj, por me shumë gjasa ky proces nuk ka për të ndodhur këtë vit. Çfarë ka ndodhur realisht? Në qershor të vitit 2015 hyri në fuqi ligji dhe sipas parashikimeve në të, pas një muaji duhej të bëhej zgjedhja e anëtarëve të Autoritetit. Një gjë e tillë nuk ndodhi aspak, edhe pse kanë kaluar rreth tre muaj. Sipas ligjit, duhej që edhe qeveria brenda dy muajve nga hyrja në fuqi, që i bie në shtator, duhej të kishte nxjerrë aktet nënligjore, por edhe kjo nuk ka ndodhur. Një tjetër zvarritje ndodhi edhe sa i përket përzgjedhjes së kandidaturave për anëtarë të Autoritetit. Afati i vënë u shty, ndërkohë që ende nuk dihet se kur do të bëhet përzgjedhja e të pestë anëtarëve që do përbëjnë atë.

  Përbërja e komisionit

Autoriteti i hapjes së Dosjeve do të përbëhet nga pesë anëtarë. Një anëtar është propozim i qeverisë, një i të përndjekurve politikë, një i shoqërisë civile dhe dy do jenë përfaqësues të Kuvendit. Pak ditë më parë, Nënkomisioni për të Drejtat e Njeriut zhvilloi një seancë dëgjimore me ta, ku u bë përjashtimi i dy kandidaturave. Një prej tyre ishte bashkëpunëtor i Sigurimit, ndërsa një tjetër u largua vetë. Në garë aktualisht mbetën 11 kandidatë. Por i gjithë procesi ka hyrë në ngërç, pasi anëtarët nuk pajisen dot me certifikata sigurie. Tashmë faza që pritet të ndodhë është dërgimi i kandidaturave në seancë plenare për votim. Ende nuk dihet se kur do të ndodhë një proces i tillë, i cili do t?i hapte më pas rrugën grumbullimit të dosjeve dhe nisjes së punës për hapjen e tyre.





Lajmet e fundit nga