E fundit!

09:24 Aktualitet

Tirana në “Top 5” e qyteteve më të papërballueshme në Evropë për blerjen e një shtëpie

Çmimet e shtëpive janë rritur shumë më shpejt se të ardhur...

Berisha-Meta, takim ne Vjenë?

22 Tetor 2015, 09:08, Aktualitet CNA

Udhëtimi i dy ish-aleatëve, Sali Berishës dhe Ilir Metës, në të njëjtin avion, nga Vjena në Rinas, nuk ka qenë një rastësi. Zbardhen detaje dhe rrethana të reja, rreth largimit të njëkohshëm nga Shqipëria, të Sali Berishës dhe Ilir Metës, si dhe rikthimit të tyre në të njëjtin avion, nga Vjena në tokën shqiptare. Sipas burimeve, Sali Berisha dhe Ilir Meta kanë shkëmbyer vetëm një përshëndetje në avion, por kjo nuk do të thotë se ata nuk janë takuar para se të niseshin për në Rinas.

Teksa Tirana është mbuluar nga thashethemnaja e aleancave fluide, dyshimet për një flirtim mes Ramës dhe Bashës, mesazhet e koduara dhe tensioni, dy ish-aleatët Sali Berisha dhe Ilir Meta mësohet se kanë zhvilluar një takim në Vjenë. Sigurisht që nuk ka të dhëna rreth përmbajtjes së bisedës, por mësohet se Ilir Meta dhe Sali Berisha janë takuar në një ambient miqësor në Vjenë, para se të niseshin për Rinas.

Flitet se takimi mes Metës dhe Berishës është ndërmjetësuar nga një përfaqësues i lartë i diplomacisë së Shteteve të Bashkuara të Amerikës. Edhe pse mes tyre nuk ka pasur ndonjë thyerje të madhe, madje ditët e fundit shkëmbyen mesazhe bashkëpunimi në distancë dhe trokitën gotat në Festën Kombëtare të Kinës, thuhet se takimi është ndërmjetësuar nga një zyrtar i lartë amerikan. Për zhvillimin e takimit flitet gjithashtu se ka influencuar edhe një zyrtar i Brukselit, çka i jep takimit një dimension tjetër. Pra siç duket, ka pasur një koordinim të mëparshëm mes Brukselit dhe Uashingtonit për takimin në fjalë si dhe një interes për pajtimin e dy ish-aleatëve.

Edhe pse Berisha dhe Meta publikisht kanë mohuar një bashkëpunim politik, përpos përputhjes së qëndrimeve për hetimin ndërkombëtar të CEZ, ky takim mund të ndryshojë konjukturat dhe lojën në politikën shqiptare. Afrimi mes Metës dhe Berishës vjen në një kohë kur mes Metës dhe Ramës ka një klimë të thellë dhe të vazhdueshme mosbesimi, ndërsa linja zyrtare e PD ka ndërprerë pothuajse plotësisht sulmet ndaj kreut të Kuvendit, duke e përqendruar shënjestrën tek Rama, Gjiknuri, Beqja dhe Lame. /Gazeta SOT