Mesila Doda: Gjysma e Parlamentit me sigurimsa, ja pse u hoqën deputetët nga hapja e dosjeve

24 Prill 2015, 06:16, Aktualitet CNA

Deputetja demokrate, njëkohësisht mbështetësja e ligjit të shoqërisë civile për hapjen e dosjeve dhe lustracionin, Mesila Doda shprehet se nëse qeveria nuk do të hiqte deputetët nga hapja e dosjeve, atëherë ligjvënësit nuk do të votonin projektligjin e propozuar nga ministri Veliaj.

Në një reagim për gazetën “Sot”, Mesila Doda tha se deputetët u hoqën nga procesi i hapjes së dosjeve për një arsye të kuptueshme sipas saj, pasi gjysma e spiunëve ndodhen sot brenda Parlamentit. Sipas Dodës, ligji i qeverisë për hapjen e dosjeve është bërë sa për të kaluar radhën. Ajo tha se ligji i ministrit Veliaj vazhdon të mbrojë spiunët dhe të dënojë hallexhinjtë, ata të cilët kanë qenë të detyruar të persekutojnë. ?Nga lista për hapjen e dosjeve janë hequr dhe deputetët. Këtë e bënë sepse gjysma e spiunëve janë brenda. Deputetët nuk e kalonin ndryshe ligjin, do e votonin kundra. Është shumë e thjeshtë, spiunët i ke brenda në Parlament. Kjo është poshtërsia më e madhe. Të mbrosh deputetët spiunë dhe ti dhe të heqësh ato hallexhinjtë që mund të kenë qenë të shtrënguar për 1001 arsye, kjo është çmenduri. Nëse ti bën këtë standard atëherë bëjë. I hap për të gjithë dosjet, dhe jo hap për ca dhe mbro ca të tjerë?, tha deputetja demokrate për gazetën ?Sot?.

Ligji mbron spiunët

Mesila Doda shprehet po ashtu edhe për ligjin në tërësi. Sipas saj, ligji vazhdon të mbrojë spiunët e ish-Sigurimit. Doda deklaron se dosjet nuk do të hapjen për personat që janë në poste drejtuese dhe për ata që sot kanë në dorë vendimmarrjen. Gjithashtu, Doda shprehet se ligji është shumë i kufizuar për dhënie informacioni. Sipas saj, edhe kur merret informacioni për një dosje të caktuar në fakt nuk dihet se ku përfundon ky informacion, kush i merr këto të dhëna. ?Ligji vazhdon të mbrojë pushtetarët dhe ata që sot janë në pushtet. Pra, viktimat vazhdojnë të mbeten viktima, persekutorët vazhdojnë të mbeten persekutorë. A është shtruar pyetja pse nuk hapen dosjet për këta që janë sot në poste drejtuese, pse nuk hapen dosjet për personat që kanë në dorë sot vendimmarrjen. Pra, mund të marrë informacion drejtuesi i institucionit apo kryetari i partisë po nuk dihet se ku e çon informacionin, nuk dihet se çfarë bën me të. Pra, praktikisht nuk do të hapet as edhe një dosje. Ligji që kanë sjellë është sa për të larë gojën, për të thënë që ne po bëjmë diçka. Dhe ky nuk është ligj. Ata më mirë ta tërhiqnin nëse nuk e kalonin dot. Por kjo histori ?nuk hapet për këtë, nuk hapet për tjetrin e kështu me radhë, atëherë mund të ma thonë se për kë do të hapen? Apo do të hapen ca arkiva për të shkruar disa libra?, deklaroi Doda.

Iniciativë të re

Pas rrëzimit të projektligjit të propozuar nga shoqëria civile dhe që u mbështet nga Doda dhe Shpëtim Idrizi, deputetja demokrate tha se do të ndërmarrë iniciativa të tjera për hapjen e dosjeve. ?Sa të mbyllet kjo, unë kam iniciativa të tjera që do të futen në parlament me shumë urgjencë për dekomunisitizimin e shoqërisë. Ky është një proces i gjatë, futja në kuadër ligjor, rezoluta etj., është një platformë e tërë së cilës unë kam ndërmend ti përkushtohem. Unë kam mbështetje nga të gjithë shtresat. Unë ndryshimet do t?i sjell pastaj po të duan le ti hedhin poshtë, siç e bënë me ligjin. Le ti hedhin poshtë nëse kanë guximin dhe le të vazhdojnë t?u thonë shqiptarëve ?nuk duam që ta mbyllim të kaluarën dhe le të vazhdojnë ti mbrojnë persekutorët?, tha Doda.