E fundit!

09:23 Aktualitet

Shqipëria avancon në negociatat me BE-në, sot hap i ri drejt integrimit europian

Shqipëria shënon një tjetër moment të rëndësishëm në rrugë...

Gjykata e Strasburgut: Shkarkim i padrejtë i Canit/ Shuplakë Vettingut

4 Tetor 2022, 10:37, Vetingu CNA

Gjykata Europiane e Strasburgut e ka quajtur të padrejtë shkarkimin e prokurorit Besnik Cani nga Vettingu.

Sipas GJEDNJ-së, prokurori Besnik Cani nuk është gjykuar me të drejtë, pasi ka pasur shkelje të Konventës.

"Në vendimin për Besnik Canin ka pasur shkelje të Konventës. I është mohuar e drejta për një proces ligjor të rregullt", thuhet në vendimin e GJEDNJ-së.

Një vit më parë u shkarkua nga KPA

Me 20 shkurt 2022, Kolegji i Posaçëm i Apelimit, ka shkarkuar anëtarin e Këshillit të Lartë të Prokurorisë, Besnik Cani.

Vendimi u motivua me mungesën e burimeve të ligjshme për justifikimin e pasurisë dhe cenimin e besimit të publikut te sistemi i drejtësisë.

Në arsyetim, Kolegji u dha të drejtë pothuajse të gjitha pikave të ankimit të Komisionerit Publik, Florian Ballhysa, ndërsa e cilësoi vendimin e shkallës së parë të vetingut për konfirmimin e Besnik Canit të padrejtë dhe të pabazuar në ligj.

Kolegji evidentoi mungesë burimesh të ligjshme për të justifikuar blerjen e një apartamenti si dhe kursimet e deklaruara për vitet 2005-2006 nga Cani. I njëjti përfundim u arrit edhe për mbulimin e shpenzimeve për vitet 2010-2015.

Lidhur me blerjen e një sipërfaqeje trualli në Paskuqan, një automjeti të markës “Benz” dhe një garazhi pa deklaruar burimin e krijimit, Kolegji arriti në përfundimin se Cani kishte cenuar besimin e publikut te sistemi i drejtësisë.

Kolegji arriti në përfundimin se Cani kishte cenuar besimin e publikut edhe në kriterin e profesionalizimit, përmes lidhjes së një kontrate me kompaninë “Kastrati” për ndërtimin e një karburanti dhe një njësie shërbimi mbi truallin e tij në Paskuqan, përfshirjes në mënyrë të padrejtë të bashkëshortes së tij në listën e kredive të buta në Fier si dhe në pushimin e një procedimi penal në vitin 2006.

Sa i përket kontratës me “Kastratin”, Kolegji argumentoi se prokurori Cani “nuk mund të gëzojë besimin se mund të ushtrojë në mënyrë të pavarur funksionin e tij”.

Besnik Cani e kaloi fazën e parë të vetingut më 27 nëntor 2018, ndonëse 4 çështje që lidheshin me etikën dhe profesionalizmin u dërguan për inspektim nga Komisioni i Pavarur i Kualifikimit.

Vendimi u kritikua nga Operacioni Ndërkombëtar i Monitorimit dhe më pas Komisioneri Publik, të cilët evidentuan se KPK kishte hequr dorë nga funksioni për rivlerësimin e subjektit.

Në Kolegj, Cani dhe avokati i tij, Eduard Halimi, udhëhoqën një betejë kundër dy anëtarëve të trupës, duke sfiduar legjitimitetin e tyre në Kolegjin e Posaçëm të Apelimit.

Para fillimit të procesit, subjekti kallëzoi në SPAK relatorin Luan Daci për falsifikim të formularit të deklarimit lidhur me arsyet e largimit të tij si gjyqtar, ndërkohë që gjyqtari Ardian Hajdari u kontestua se ishte zgjedhur në KPA në kundërshtim me ligjin, pasi kishte një mesatare më të ulët sesa e kërkonte ligji.