E fundit!

19:13 Aktualitet

Jorida Tabakun e merr malli për Erion Veliajn

Deputetja e Partisë Demokratike, Jorida Tabaku duket se e ...

Elon Musk blen "Twitter"-in

28 Tetor 2022, 09:23, Tech CNA

Njeriu më i pasur në botë, Elon Musk, ka kompletuar blerjen e kompanisë "Twitter", raportuan mediat në Shtetet e Bashkuara. Marrëveshja është në vlerë prej 44 miliardë dollarësh.

Ai shkroi në "Twitter" se “zogu është liruar”, një referencë për logon e kësaj kompanie, por si duket edhe për dëshirën e tij që kjo kompani të ketë më pak kufizime lidhur me përmbajtjen që postohet në të.

Raportohet se një numër i udhëheqësve të kompanisë janë pushuar nga puna, përfshirë edhe shefin e "Twitter"-it, Parag Agrawal.

Me përmbylljen e marrëveshjes merr fund edhe saga gjyqësore, pasi "Twitter" e kishte iniciuar një rast në gjykatë me qëllim që ta detyronte miliarderin që t’i përmbahej marrëveshjes së blerjes së kompanisë.

"Twitter" ende nuk e ka konfirmuar përmbylljen e marrëveshjes, por një investitor në këtë kompani i tha "BBC"-së se marrëveshja është finalizuar.

Musk ka qenë kritik i politikave të "Twitter"-it dhe lajmi se ai ka blerë këtë platformë të rrjeteve sociale është pritur me ndjenja të përziera nga përdoruesit e "Twitter"-it dhe punëtorët.

Miliarderi megjithatë ka thënë se ai dëshiron që të parandalojë që kjo platformë të bëhet vend për përhapjen e urrejtjes dhe pikëpamjeve ndarëse.

Ai dëshiron që ndryshojë algoritmat që përcaktojnë se si përmbajtja u paraqitet përdoruesve të "Twitter"-it.

Musk ende nuk ka ofruar detaje se si do t’i arrijë këto qëllime. Ai ka paralajmëruar se do të shkurtojë numrin e punëtorëve, duke lënë vetëm afër 7.500 punëtorë. Të enjten, ai po ashtu tha se nuk do ta blejë kompaninë për të fituar para, por “për të ndihmuar njerëzimin, të cilin e dua”.

Përveç shefit ekzekutiv, Parag Agrawal, po ashtu raportohet se nga puna janë pushuar edhe shefi i financave, Ned Segal dhe ai për çështje ligjore dhe politika, Vijaya Gadde. Sipas raportimeve, Musk i ka akuzuar këta persona se e kanë mashtruar atë dhe investitorët e tjerë të "Twitter" lidhur me numrin e llogarive të rreme në këtë platformë.

Përpara se të përmbyllte marrëveshjen e blerjes së kompanisë "Twitter" në vlerë prej 44 miliardë dollarësh, Musk shkoi në selinë e "Twitter"-it të mërkurën duke mbajtur në duar një lavaman porcelani. Siç thuhet, kjo vizitë kishte për qëllim që të qetësonte punëtorët lidhur me shkurtimet në këtë kompani dhe për të siguruar ata se kritikat e tij në të kaluarën për kompaninë, nuk do ta dëmtojnë atë.

“'Twitter' padyshim se nuk mund të bëhet një vend i lirë për gjëra të këqija, ku çdo gjë mund të thuhet pa pasur pasoja”, tha Musk përmes një letre të hapur që i dërgoi "Twitter"-it të enjten.

Musk më herët ka paralajmëruar se do të rikthejë disa prej llogarive të bllokuara në të kaluarën, përfshirë atë të ish-presidentit amerikan, Donald Trump, që u përjashtua nga "Twitter" pasi mbështetësit e tij sulmuan Kongresin amerikan.

Përmbyllja e marrëveshjes vjen pas disa muajsh përplasjes mes "Twitter"-it dhe Musk. Miliarderi më 4 prill njoftoi se dëshironte të blinte 9.2 për qind të aksioneve të kompanisë, duke e bërë atë aksionarin më të madh.

Por, ai u tërhoq nga blerja e kompanisë në minutat e fundit, pasi ndryshoi ofertën. Pas një jave, dy palët u pajtuan për çmimin.

Por, në javët në vijim, Musk shprehu dyshime, duke deklaruar publikisht se numri i llogarive të rreme në këtë platformë ishte shumë më i lartë se shifrat e paraqitura nga "Twitter".

Më 8 korrik, Musk u tërhoq nga marrëveshje duke thënë se "Twitter" e kishte mashtruar atë duke i ofruar informacione të gabuara. Por, vetëm katër ditë më vonë, kompania e paditi atë, duke kërkuar nga gjykata që të detyronte miliarderin që të mos tërhiqej nga marrëveshja për blerje.

Shumica e ekspertëve ligjorë argumentuar se "Twitter" do të fitonte betejën në gjykatë dhe më 4 tetor, një muaj para se të niste gjykimi, Musk njoftoi për planet se do të vazhdonte me përmbylljen e marrëveshjes për blerjen e kompanisë, me çmimin që kishte premtuar./REL