E fundit!

13:54 Aktualitet

Debati për zonat e mbrojtura/ Rasti "Ria Formosa" dhe Revolucioni Portugez i Turizmit

Nga Edi Rama Kur flitet për zhvillimin në zonat e mbrojtu...

Triumf i pastër, Napoli merr kryesimin

4 Janar 2025, 20:32, Sport CNA

Napoli nuk di të ndalet në Serinë A. Skuadra e drejtuar nga Antonio Conte vazhdon me serinë e fitoreve, pasi mposhti me rezultatin e pastër 3-0 Fiorentinën në transfertë.

Një ndeshje pa shumë histori, e dominuar totalisht nga miqtë, të cilët në fund u shpërblyen me një tre pikësh të artë.

Tentativat e njëpasnjëshme nga Napoli, u konkretizuan me gol në minutën e 29-të. Ishte braziliani David Neres, i cili kaloi disa kundërshtarë dhe me një gjuajtje të fortë, e ndali topin në fundin e rrjetës.

Fiorentina reagoi menjëherë, duke gjetur golin e barazimit në minutën e 35-të me Moise Kean, por u anulua për pozicion jashtë loje.

Pjesa e parë u mbyll me avantazhin minimal të napolitanëve, të cilët edhe fraksionin e dytë e nisën vrullshëm dhe në sulm.

Në minutën e 54-t, Lukaku nuk gaboi nga penalltia, për të dyfishuar shifrat. Goditjen përfundimtare për skuadrën nga Firence e dha McTominay, i cili në minutën e 68-të, realizoi të tretin për miqtë.

Deri në fund, Napoli ia doli të ruajë portën e paprekur, për të marrë një sukses tejet të rëndësishëm. Me këtë triumf, skuadra e Contes ngjitet në krye të renditjes me 44 pikë, 3 më shumë se Atalanta dhe 4 më shumë se Interi, por këta të fundit kanë ndeshjet e tyre për të luajtur.

Në krahun tjetër, Fiorentina renditet në vendin e gjashtë me 32 pikë të grumbulluara dhe nuk njeh fitore prej katër ndeshjesh.

Më herët, Venezia dhe Empoli barazuan 1-1 mes tyre, në sfidën e vlefshme për mbijetesë. Një gafë e portierit Vasquez, i dha avantazhin e hershëm Venecias, pas vetëm 5 minutash lojë.

Megjithatë, miqtë reaguan menjëherë dhe barazuan shifrat në minutën e 32-të. I përhershmi Esposito, nuk gaboi i vetëm në zonë, duke mposhtur portierin kundërshtar, për ta dërguar rezultatin në 1-1, ndërsa nuk ndryshoi deri në fund.

Me këtë barazim, Venecia mban vendin e 19-të me 14 pikë, ndërsa Empoli me 6 pikë më shumë, mban vendin e 12-të në renditje.