web counter
LEXO PA REKLAMA!

SHKARKO APP

App Store
Google Play

Tifozët e Milanit në protestë, zbulohet vendimi për ndeshjen e fundjavës

3 Maj 2024, 12:49, Sport CNA

Tifozët e Milanit në protestë, zbulohet vendimi për ndeshjen

Situata te Milani në këtë fund të sezonit, nuk është aspak e qetë. Tifozët, prej kohësh kanë shfaqur pakënaqësi dhe tani kanë marrë hapa konkretë.

Tifogrupi zyrtar i kuqezinjve, “Curva Sud”, ka vendosur të protestojë në ndeshjen e kësaj fundjave ndaj Genoa-s.

Në njoftimin e tifozëve, thuhet se në sfidën që do të luhet në “San Siro”, nuk do të ketë banderola dhe flamuj në tribunën e tyre.

Gjithashtu, nuk do të ketë as kore mbështetëse për ekipin. Kjo kërkesë u është bërë edhe të pranishmëve të tjerë, që do të jenë në shkallët e stadiumit.

Ultrasit kërkojnë që të vazhdohet me linjën e investimeve të ndërmarra në sezonin e kaluar dhe të zgjidhet një trajner që rrit të rinjtë dhe merr lojtarë për të mbuluar pozicionet ku ekipi ka nevojë.

Tifozët thonë që nuk u takon atyre të zgjedhin trajnerin, por presin një sinjal nga klubi, që synon vazhdimin e projektit të nisur një vit më parë.

Këto reagime vijnë në një moment, ku Milani po kalon vështirësi të mëdha. Kuqezinjtë u eliminuan nga Roma në çerekfinalen e Europa League, ndërsa pak ditë më vonë, u mposhtën edhe në derbi, aty ku Interi siguroi titullin kampion të 20-të, duke vendosur edhe yllin e dytë në fanellë.

Mbetet të shihet si do të veprojë klubi, pas protestave të tifozëve, nëse do të vazhdohet projekti, apo do të ketë një revolucion në verë.





Lajmet e fundit nga