E fundit!

19:16 Aktualitet

Për rreth një muaj çdo ditë në shesh/ Mbahet protesta e 28-të kundër qeverisë

Ka nisur protesta e 28-të kundër qeverisë. Ashtu si në dit...

Statistikat/ Barcelona e Flick, më e dobët se ajo e Xavi-t

23 Dhjetor 2024, 20:49, Sport CNA

Barcelona e nisi sezonin në mënyrë të shkëlqyer, por skuadra e drejtuar nga Hansi Flick po has vështirësi të mëdha.

Pas 19 ndeshjeve të luajtura, katalanasit kanë regjistruar pesë humbje, një statistikë e cila barazon numrin e disfatave të sezonit të kaluar kur ekipi drejtohej nga Xavi Hernandez. Në atë sezon, Barcelona e përfundoi kampionatin në vendin e dytë me një bilanc prej 26 fitoreve, shtatë barazimeve dhe vetëm pesë humbjeve në 38 ndeshje të zhvilluara.

Për më tepër, Barcelona e Flick ka pësuar 22 gola deri tani, një shifër që ngjall shqetësim dhe që tregon për një mbrojtje të dobësuar në krahasim me edicionin e kaluar. Nëse performanca e dobët vazhdon, situata mund të përkeqësohet më tej, duke e bërë të vështirë për ekipin që të luftojë për titullin e kampionit.

Humbja e fundit e Barcelonës ndodhi këtë fundjavë, kur u mposhtën 1-2 nga Altetico Madrid në shtëpi. Kjo ishte disfata e pestë në kampionat dhe një tjetër dëshmi e krizës që po kalon skuadra. Nga 21 pikët e fundit të mundshme, Barcelona ka grumbulluar vetëm pesë, një performancë që nuk i përket një ekipi me ambicie të larta siç janë katalanasit.

Jo vetëm rezultatet janë shqetësuese, por edhe mënyra se si po luan skuadra. Deficitet taktike, gabimet në mbrojtje dhe mungesa e efikasitetit në sulm kanë qenë disa nga faktorët kryesorë që kanë ndikuar në këtë situatë. Krahasuar me sezonin e kaluar, ekipi duket të ketë humbur intensitetin dhe qartësinë në fushë.

Megjithatë, pushimi i Krishtlindjeve shihet si një mundësi për ekipin që të rikuperohet fizikisht dhe mendërisht, duke i dhënë Hansi Flick kohë për të analizuar dhe përmirësuar gabimet. Drejtuesit e klubit dhe trajneri kanë një detyrë të vështirë përpara, të ndryshojnë rrjedhën e sezonit dhe të rikthejnë besimin në mesin e tifozëve.

Më 4 janar, Barcelona do të nisë aventurën e saj në Kupën e Mbretit kundër Barbastros, një ndeshje që shihet si një mundësi për të rifituar ritmin dhe për të filluar vitin 2025 me këmbën e mbarë.