E fundit!

08:07 Aktualitet

Rama: Ja kur e pranoj dorëheqjen

Kryeministri Edi Rama e ka nisur mëngjesin e kësaj të prem...

Rikthimi te Santos, zhgënjen Neymar

11 Shkurt 2025, 15:17, Sport CNA

Aventura e Neymar në rikthimin e tij te Santos nuk ka rezultuar ashtu siç pritej. Rikthimi i brazilianit në klubin ku nisi gjithçka nuk ka qenë magjik, por një realitet i vështirë, ku forma e tij e dobët ka lënë pas vetëm zhgënjim dhe konfuzion.

Pasi kaloi më shumë se një vit jashtë fushës për shkak të dëmtimit të rëndë të ligamenteve, Neymar u rikthye te Santos me shpresën për të gjetur ritmin e duhur dhe për të rilindur si lojtari që dikur mbante mbi shpatulla pritshmëritë e një kombi të tërë. Megjithatë, realiteti ka qenë shumë ndryshe. Në ndeshjen e fundit, ai nuk arriti të shfaqë magjinë që dikur e bënte të frikshëm për mbrojtjet kundërshtare. Statistikat flasin qartë: 24 topa të humbur, 7 tentativa driblimi të pasuksesshme dhe asnjë gjuajtje në portë në 74 minuta lojë. Këto janë shifra që nuk i përshtaten një lojtari që dikur konsiderohej si pasardhësi i Ronaldinjos dhe që mbante mbi supe statusin e lojtarit më të shtrenjtë në histori.

Sigurisht, rikuperimi nga një dëmtim kaq serioz nuk është kurrë i lehtë. Për më tepër, problemet fizike të Neymarit nuk kanë qenë të kufizuara vetëm te ligamentet. Çështjet e dukshme të mbipeshës dhe mungesa e minutave të luajtura kanë ndikuar ndjeshëm në performancën e tij. Pavarësisht dëshirës për të rikthyer shkëlqimin e dikurshëm, trupi i tij ende nuk po i përgjigjet mendjes që dikur shpikte magji në fushë.

Në një përpjekje për të ndihmuar ekipin, Neymar fitoi disa faulle për Santos, por ato nuk u shfrytëzuan dot nga shokët e skuadrës. Ndikimi i tij në lojë duket se është larg asaj që kërkohet nga një lider, një faktor që shton edhe më shumë presionin mbi të dhe mbi klubin. Ndërsa Santos po përpiqet të gjejë stabilitetin në kampionat, prania e Neymarit është shndërruar më shumë në një çështje polemikash sesa në një garanci për sukses.

Rikthimi te Santos ishte një vendim strategjik për të rifituar formën dhe ndoshta për të synuar transferimin në një ekip tjetër të madh. Megjithatë, me këtë ecuri, ofertat e mëdha mund të jenë gjithnjë e më të pakta. Klubet që dikur do të bënin gjithçka për ta pasur në skuadër tani mund të hezitojnë të marrin një lojtar me një histori dëmtimesh dhe me një formë të pasigurt.

Rrugëtimi i Neymarit, është duke kaluar një nga momentet më të vështira. Nëse ai nuk arrin të kthejë shpejt formën dhe të provojë se ende mund të jetë një faktor në nivelet më të larta, atëherë ky kapitull i karrierës së tij mund të mbyllet me zhgënjim.