web counter
LEXO PA REKLAMA!

SHKARKO APP

App Store
Google Play

E fundit!

x

"Tronditet" Tirana, Shkëmbi pa 9 lojtarë ndaj Skënderbeut

11 Shkurt 2025, 15:01, Sport CNA

"Tronditet" Tirana, Shkëmbi pa 9 lojtarë ndaj

Tirana ndodhet përpara një sfide shumë të vështirë ndaj Skënderbeut, jo vetëm për shkak të rëndësisë së ndeshjes, por sidomos për shkak të mungesave të shumta. Me plot nëntë lojtarë titullarë dhe një zyrtar të pezulluar, trajneri Bledi Shkëmbi gjendet përballë një rebusi të vështirë për të formuar një 11-she kompetitive në këtë sfidë.

Një pjesë e madhe e mungesave vjen si pasojë e ndëshkimeve të marra pas derbit me Partizanin. Gjyqtari Eldorjan Hamiti, në minutën e 91-të, nxori me karton të kuq Gjumsin për ofendim ndaj arbitrit. Por ky nuk ishte i vetmi episod problematik. Marku, Mici dhe Kozi u përjashtuan për përfshirjen e tyre në një përplasje me lojtarët e Partizanit, duke lënë skuadrën me disa mungesa të tjera të rëndësishme.

Për më tepër, Tirana do të jetë pa Ndrecën dhe Përgjonin, të cilët kanë plotësuar numrin katër të kartonëve të verdhë.

Sikur të mos mjaftonin mungesat për shkak të pezullimeve, Tirana duhet të përballet edhe me disa dëmtime të rëndësishme. Ismajli, Soler dhe Haxhiu ndodhen në infermieri dhe gjasat që të jenë të gatshëm për këtë ndeshje janë të vogla. Kjo e bën edhe më të vështirë detyrën e trajnerit Shkëmbi, i cili duhet të improvizojë një formacion krejtësisht ndryshe nga ai që kishte menduar.

Me 9 titullarë jashtë, Tirana do të jetë e arnuar ndaj Skënderbeut. Një situatë që mund të ketë pasoja jo vetëm në këtë ndeshje, por edhe në ecurinë e sezonit.

Për trajnerin Shkëmbi, formimi i një 11-sheje të qëndrueshme është një sfidë më vete. Porta pritet të mbrohet nga Selmani, i cili është një nga të paktët lojtarë të rëndësishëm që është i gatshëm për këtë sfidë. Mbrojtja ka pësuar goditje të mëdha, por do të improvizohet me Vera, Dembele, Kolën dhe Metën. Mesfusha mund të përbëhet nga Rafael, Smaçi dhe ndoshta Abah, ndërsa në sulm mund të aktivizohen Bajroviç, Zharmuni dhe Ernest.

Në stol, përveç disa të rinjve, Tirana do të ketë opsione shumë të kufizuara, si Prengaj, Mihana dhe Harizaj, të cilët mund të aktivizohen në varësi të zhvillimeve të ndeshjes.

Duke marrë parasysh mungesat e shumta dhe formën jo optimale të skuadrës, sfida ndaj Skënderbeut do të jetë një provë e vërtetë karakteri për Tiranën. Do të duhet një shpirt gare i madh dhe një organizim perfekt për të dalë me rezultat pozitiv nga kjo situatë kaotike. Pavarësisht vështirësive, bardheblutë nuk mund të dorëzohen, pasi çdo pikë është jetike në këtë fazë të sezonit.





Lajmet e fundit nga