Qeveria harron bastet dhe investimet në sport, gjithçka mbetet enigmë

12 Korrik 2023, 09:58, Sport CNA

Ministria e Financave ka hedhur që me datë 4 prill për konsultim publik projektligjin “Për disa shtesa dhe ndryshime në ligjin nr. 155/2015 “Për lojërat e fatit në Republikën e Shqipërisë”, i ndryshuar. Edhe pse ka parashikuar një afat 1-mujor, për dhënien e mendimeve për këtë projektligj, ende nuk dihet se çfarë po bëhet me të.

Ministria, nga ana e saj, mendon se e ka përmbushur detyrimin e saj, duke thirrur aktorët, si p.sh. Komitetin Olimpik Kombëtar Shqiptar, si dhe të gjitha federatat, në një tryezë të rrumbullakët, ku ka bërë një prezantim të projektligjit dhe të relacionit që e shoqëron atë. Burime nga ishkompanitë e basteve thonë se ato nuk janë konsultuar mjaftueshëm dhe nuk dinë nëse sugjerimet e tyre janë marrë parasysh në rishikimin e këtij projektligji. Ndërkohë që jemi në muajin korrik dhe ky projektligj ende nuk është diskutuar në komisionet parlamentare dhe, siç dihet, procedurat kërkojnë kohën e tyre, derisa ky ligj të miratohet nga parlamenti. Ndërkohë që miratimi i tij është i lidhur ngushtë me një sërë investimesh kritike në sport, që aq shumë priten, jo vetëm nga komuniteti sportdashës, por edhe nga publiku i gjerë.

Shqipëria ka shënuar ndërkohë disa rezultate impresionuese në disa sporte, si në mundje, atletikë, karate, peshëngritje, boks, taekuondo etj., dhe pritshmëritë janë të mëdha për rezultate të tjera të larta në arenën ndërkombëtare. Si do të bëhen investimet aq shumë të kërkuara në sport? Si do të bëhet përgatitja e ekipeve kombëtare, që do të prezantojnë Shqipërinë në Lojërat e ardhshme olimpike “Paris 2024”, kur buxheti i akorduar për federatat është minimalist? Me buxhete të tilla nuk mund të kemi pretendime për një përfaqësim dinjitoz të Shqipërisë në këto Lojëra dhe për të marrë medaljet aq të dëshiruara për të gjithë shqiptarët. Në draftin aktual të këtij projektligji duket se ka mangësi të mëdha edhe për sa i përket vlerës minimale, se si mund të luhet në bastet “online”, ku kërkohet kartë krediti edhe për vlera të papërfillshme, si p.sh. 100 lekë. Nëse nuk vihet një standard për vlerën minimale kur kërkohet kartë krediti, ky projektligj do të dështojë dhe njerëzit do të tërhiqen e do të luajnë në tregun e zi, ku procedurat janë më të thjeshta. Në këtë mënyrë drafti i deritanishëm është evaziv dhe lë vend për abuzime.

MUNGESA E MINISTRISË SË SPORTEVE – Po diskutohet një projektligj për sportin, ku ministria përgjegjëse për sportin nuk është pjesë e Komisionit të Licencave, ku dihet se të ardhurat që do të vijnë nga bastet “online” do të jenë të dedikuar për projekte për sportin dhe inovacionin. Nga ana tjetër, federatat dhe shoqatat sportive janë të paqarta në lidhje me kriteret dhe procedurat që ato duhet të ndjekin në lidhje me aplikimin për projekte të ndryshme në fushën e sportit. Edhe në këtë rast duket se financimi i sportit do të ngelet peng i humorit të qeverisë, apo i ministrit të radhës, nëse do të kryhen financimet aq të dëshiruara në sport, apo jo.

Për më tepër duket se ky projektligj bie në kundërshtim edhe me ligjin aktual për sportin, në të cilin parashikohet krijimi, pranë ministrisë përgjegjëse për sportin, i Fondit Kombëtar për Zhvillimin e Sportit nga të ardhurat që sigurohen nga bastet sportive dhe lojërat e fatit, sipas legjislacionit në fuqi për lojërat e fatit. Nuk dihet se si është menduar zgjidhja e një kontradikte të tillë, kur vetë ministria përgjegjëse për sportin nuk është e përfshirë në Komisionin e Licencave! Duket se edhe nëse gjithçka shkon mirë, instancat përkatëse janë shumë vonë në lidhje me informimin e publikut, pasi nuk është menduar akoma, se si do të promovohen në publik bastet “online”, si do të mbrohen konsumatorët minorenë nën 18-vjeç, që të mos përfshihen në bastet “online” etj