Puthi futbollisten pa dëshirë, dënohet Luis Rubiales

20 Shkurt 2025, 17:08, Sport CNA

Gjykata e Lartë e Spanjës ka shpallur fajtor për sulm seksual ish-presidentin e Federatës Spanjolle të Futbollit, Luis Rubiales, për incidentin e ndodhur gjatë ceremonisë së ndarjes së medaljeve në finalen e Kupës së Botës për femra në vitin 2023. Ngjarja, e cila ndodhi pas fitores historike të Spanjës ndaj Anglisë, bëri bujë në mbarë botën dhe nxiti një debat të gjerë mbi kulturën e pabarazisë dhe abuzimit me pushtetin në sport.

Rubiales u dënua me një gjobë prej 10 mijë e 800 eurosh dhe i është ndaluar çdo kontakt me futbollisten spanjolle Jenni Hermoso për një periudhë prej një viti. Përveç kësaj, ai duhet të mbajë një distancë prej të paktën 200 metrash nga ajo. Gjykata, megjithatë, e shpalli atë të pafajshëm për akuzën e detyrimit, e cila lidhej me përpjekjet e dyshuara për ta bindur Hermoson të deklaronte publikisht se puthja kishte qenë me pëlqim të ndërsjellë.

Ngjarja ndodhi gjatë festimeve të triumfit të ekipit spanjoll në finalen e Kupës së Botës, e mbajtur në Sidnei në Australi. Gjatë ceremonisë së ndarjes së medaljeve, Rubiales e kapi Hermoson nga koka dhe e puthi në buzë pa pëlqimin e saj. Ky veprim shkaktoi reagime të forta, si në Spanjë ashtu edhe në arenën ndërkombëtare.

Pas incidentit, Rubiales u përball me një valë protestash dhe kërkesash për dorëheqje. Fillimisht, ai refuzoi të largohej nga posti i tij, duke e cilësuar atë që ndodhi si një “moment spontan” dhe një “shenjë dashurie dhe gëzimi”. Ai madje e mbrojti veprimin e tij me justifikimin se kishte marrë miratimin e Hermosos. Mirëpo, futbollistja mohoi kategorikisht këtë version, duke theksuar se nuk kishte dhënë pëlqimin dhe se veprimi i Rubialesit i kishte prishur ditën më të rëndësishme të karrierës së saj.

Skandali çoi në reagime të ashpra nga lojtarë, trajnerë dhe figura të rëndësishme të sportit dhe politikës. Shumë prej futbollisteve të kombëtares spanjolle refuzuan të luanin për ekipin derisa të bëheshin ndryshime të rëndësishme në Federatën Spanjolle të Futbollit. Presioni i madh publik dhe ndërkombëtar e detyroi Rubialesin të jepte dorëheqjen nga posti i tij si president i Federatës në shtator 2023.

Në anën tjetër, trajneri i kombëtares, Horge Vilda, një aleat i ngushtë i Rubialesit, u shkarkua nga detyra e tij pak kohë pas incidentit. Vilda, së bashku me dy ish-zyrtarë të tjerë të Federatës Spanjolle të Futbollit, Rubén Rivera dhe Albert Luke, u akuzuan për bashkëpunim në përpjekjet për ta detyruar Hermoson të ndryshonte versionin e saj të ngjarjes. Megjithatë, të tre u shpallën të pafajshëm nga gjykata.

Ndërsa prokurorët kishin kërkuar një dënim me burg për Rubialesin, gjykata vendosi të shqiptojë vetëm një gjobë financiare.