"Dashuria" mbaron, Milani i tregon derën titullarit

19 Shkurt 2025, 18:04, Sport CNA

Lidhja mes Theo Hernandez dhe Milanit duket se po shkon drejt një ndarjeje të pashmangshme. Nga një histori dashurie dhe suksesi, në një marrëdhënie të ftohur ndjeshëm. Situata ka ndryshuar rrënjësisht në muajt e fundit. Mbrojtësi francez, i cili dikur ishte një nga shtyllat kryesore të ekipit, tani shihet më shumë si një problem sesa një aset i çmuar për të ardhmen.

Kulmi i kësaj situate erdhi në përballjen e kthimit ndaj Feyenoord në plej ofin e Ligës së Kampionëve. Kartoni i kuq që mori nuk i kushtoi vetëm skuadrës, e cila u eliminua nga kompeticioni më i rëndësishëm evropian, por edhe vetë lojtarit, i cili përveç gjobës së majme, tashmë duket se ka humbur edhe mbështetjen e drejtuesve të klubit.

Prej muajsh nuk ka pasur asnjë tentativë për rinovimin e kontratës së tij, e cila skadon në vitin 2026. Një sinjal i qartë se Milani nuk e sheh më si pjesë të planeve afatgjata. Madje, sipas raportimeve të fundit, pritet që në qershor francezi të dalë në merkato. Në të kaluarën, për të janë ofruar deri në 50 milionë euro, por duke parë ecurinë e tij në sezonin aktual, vështirë se kuqezinjtë mund të përfitojnë më shumë se 45 milionë euro.

Një ndër faktorët kryesorë për këtë formë të lojtarit, duket se është largimi i Stefano Piolit nga stoli. Me ish-trajnerin, francezi kishte gjetur hapësirën dhe besimin e nevojshëm për të shprehur potencialin e tij maksimal. Mirëpo, me Paulo Fonsekën marrëdhënia nuk ishte aspak e mirë, dhe me trajnerin e ri, Conceicao, situata nuk duket më e favorshme.

Përveç problemeve taktike dhe marrëdhënieve të ftohta me trajnerët, edhe në aspektin teknik, Hernandez nuk ka qenë më i njëjti. Gabimet e tij janë bërë gjithnjë e më të shpeshta, vendimet e nxituara në fushë kanë ndikuar negativisht në skuadër, dhe në disa raste ka qenë ndër faktorët kryesorë që kanë penalizuar Milanin.

E ardhmja e Theo Hernandez nuk është më e lidhur me ngjyrat kuqezi. Një cikël që nisi me shumë pritshmëri dhe suksese, tashmë është drejt fundit, dhe vera e ardhshme do të sjellë ndarjen përfundimtare. Tani mbetet vetëm për t’u parë se cila do të jetë oferta që do ta largojë francezin nga San Siro dhe ku do të nisë ai kapitullin e ri të karrierës së tij.