Nga formacioni ideal, te shembulli dhe lojtari më i mirë. “Zbërthehet” Mario Mitaj

20 Shkurt 2025, 14:31, Sport CNA

Nga formacioni ideal, te shembulli dhe lojtari më i mirë.

Mario Mitaj po kalon momentin më të mirë në karrierë. Transferimi në Arabinë Saudite ka rezultuar vendimtar për mbrojtësin e majtë.

Shqiptari është kthyer në një pikë kyçe për Al Ittihad dhe ka fituar zemrat e tifozëve. Në një rrëfim për faqen e klubit, Mitaj ka zbuluar gjithçka, nga formacioni ideal, te shembulli që ndjek si lojtar dhe më i miri me të cilin ka luajtur.

“Për momentin jam te kategoria e argjendtë, por mësoj çdo ditë nga shokët. Ata më ndihmojnë të rritem. Për të qenë i sinqertë, kur futem në fushë, e vetmja gjë për të cilën punoj është që të mos futem në panik dhe të mundohem të luaj futbollin që unë di. Nuk më intereson se çfarë të tjerët mendojnë dhe e vetmja gjë që shqetësohem, është fokusimi te loja.

Të jem i sinqertë, jam rritur duke parë Marcelon e Real Madridit dhe gjithmonë e kam konsideruar atë si një nga mbrojtësit e majtë më të mirë në botë dhe një nga lojtarët që unë përpiqem të ndjek si model.

Në opinionin tim, ne kemi disa nga futbollistët më të mirë që luajnë në Arabi. Ndeshjet më të bukura janë ato derbi, kundër Al Ahli apo Al Nasr, edhe për faktin se kemi fituar, por kanë qenë edhe përballje ku unë kam luajtur mirë.

Lojtari më i mirë që kam luajtur është Karim Benzema. Është një njeri që vepron njësoj me të gjithë. Ai mundohet që t’i ndihmojë të gjithë dhe është shumë e bukur që të kesh dikë si ai në skuadër.

Formacioni ideal? Në portë do të thosha Neuer. Në mbrojtje nga qendra do të thosha Pique dhe Ramos. Mbrojtësi i djathtë Dani Alves, ndërsa majtas Marcelo. Në mesfushë do të vendosja, Xavi-Iniesta dhe Messin si numër 10. Në krah të majtë do të fusja Neymar, djathtas Salah dhe në sulm Kristiano Ronaldo.

Duhet të rritem ende. Të luaj edhe për disa vite që të fus veten time aty. Mund te them se dashuria që mora nga njerëzit kur firmosa, sidomos në stadium apo edhe jashtë. Një pritje shumë e mirë, kur njerëzit të shikojnë dhe të trajtojnë me respekt.

Mendoj se pozicioni ku ndihem më i sigurt dhe luaj më mirë është si mbrojtës i majtë, sepse them se e njoh këtë rol shumë mirë dhe aty mund të jap maksimumin tim”, tha Mitaj.