Nuk ka më dyshime, Vinicius zbulon të ardhmen

12 Shkurt 2025, 19:43, Sport CNA

Sulmuesi brazilian Vinicius Junior ka vendosur t’i japë fund të gjitha spekulimeve rreth të ardhmes së tij, duke konfirmuar se ka nisur bisedimet me Real Madrid për rinovimin e kontratës. Lojtari 24-vjeçar, i cili ka qenë një nga figurat kryesore të skuadrës madrilene në vitet e fundit, ka deklaruar se dëshiron të qëndrojë në “Santiago Bernabeu” për shumë vite të tjera.

Në një intervistë të dhënë për “TNT Sport” në Brazil, Vinicius shprehu entuziazmin e tij për vazhdimësinë me klubin spanjoll.

“Është shumë emocionuese që kemi filluar diskutimet me Real Madrid për rinovimin. Kontrata ime aktuale skadon në verën e vitit 2027, por gjithmonë e kam thënë se dua të luaj këtu për një kohë të gjatë. Dua të bëj histori dhe të ndjej dashurinë e tifozëve, presidentit dhe skuadrës.”, deklaroi Vinicius.

Kjo deklaratë e qartëson përfundimisht të ardhmen e tij, duke shuar çdo thashethem për një largim të mundshëm. Interesimi i PSG-së dhe ofertat nga Arabia Saudite ishin përmendur shpesh në media, por Vinicius ka vendosur të vazhdojë rrugëtimin e tij në Madrid, aty ku ka ndërtuar emrin si një nga lojtarët më të mirë të brezit të tij.

Sulmuesi brazilian iu bashkua Real Madrid-it në vitin 2018, nga Flamengo me shumë pritshmëri. Fillimet e tij nuk ishin të lehta, pasi ai u përball me kritika për përfundimin e aksioneve dhe mungesën e efikasitetit përpara portës. Megjithatë, me kalimin e viteve, ai u transformua në një nga lojtarët më të rrezikshëm në botë, duke u bërë një pjesë e pazëvendësueshme e skuadrës së Karlo Ançelotit.

Deri më tani, Vinicius ka luajtur 193 ndeshje dhe ka shënuar 57 gola për madrilenët, por kontributi i tij shkon përtej statistikave. Shpejtësia, aftësia për të dribluar dhe shpërthimet e tij në krahun e majtë e kanë bërë atë një armë të frikshme për çdo mbrojtje.

Real Madrid nuk ka pasur asnjë dilemë mbi të ardhmen e brazilianit. Klubi e sheh atë si një lider të ardhshëm dhe një nga lojtarët më të rëndësishëm për projektin afatgjatë.

Presidenti Florentino Perez dhe drejtuesit madrilenë e dinë se një lojtar i kalibrit të tij është i pazëvendësueshëm në treg. Për këtë arsye, rinovimi i tij nuk është vetëm një formalitet, por një prioritet absolut për klubin.

Nëse gjithçka shkon sipas planit, Vinicius do të rinovojë me Real Madrid deri në qershor të vitit 2029 ose 2030, duke siguruar kështu të ardhmen e tij për shumë vite në “Bernabeu”.

Në moshën 24-vjeçare, ai ende nuk ka arritur kulmin e tij dhe me përmirësimet e vazhdueshme, e ardhmja e tij duket më e ndritur se kurrë.