web counter
LEXO PA REKLAMA!

SHKARKO APP

App Store
Google Play

Leva emocionohet para Bajernit, Barça bie sërish në Mynih

13 Shtator 2022, 23:03, Sport CNA

Rikthim i hidhur në “Allianz Arena” për Robert Levandovskin. Barcelona bën një paraqitje dinjitoze në Mynih, por kjo nuk mjafton, pasi mposhtet 2-0 nga Bajerni vendas dhe largohet pa pikë drejt Spanjës.

Vëmendja ishte te bomberi polak i katalanasve, që në verë la Bajernin dhe mbrëmjen e sotme u rikthye si kundërshtar, teksa në harkun e 20 minutave pati tri herë mundësinë të ndëshkojë ish-shokët e skuadrës, por emocionet nuk e lejuan të tregojë ftohtësinë e zakonshme para portës.

I pafat edhe braziliani Rafinja, që me një goditje nga larg flirtoi me golin, por topi përfundoi jashtë, ndërsa më pas ishte Bajerni që pas një starti të vakët, nisi të marrë kontrollin e lojës.

Sfida u zhbllokua në minutën e 50’, kur pas një këndoreje të ekzekutuar nga Kimmich, Hernandez kërceu saktë me kokë dhe dërgoi topin në rrjetë, ndërsa katër minuta më vonë ishte Sanële që dyfishoi shifrat.

Deri në fund shifrat mbetën të pandryshuara, me bavarezët që u ngjitën në krye të grupit me 6 pikë të plota dhe hodhën kandidaturën për të siguruar të parët kualifikimin, pasi dy ndeshjet e radhës i kanë ndaj Viktoria Plzen, kundërshtarit më të dobët në letër.

Nga ana tjetër, Barcelona dhe Interi do të kenë dy ndeshje radhazi kundër njëra-tjetrës, të cilat do të vendosin jo pak sa i përket skuadrës tjetër që do të avancojë më tej.

Në sfidat e tjera, Liverpuli mposhti Ajaksin 2-1, Bajer Leverkusen triumfoi 2-0 ndaj Atletiko Madrid, Club Brugge fitoi thellë 0-4 në transfertën ndaj Portos, ndërsa Eintracht Frankfurt mori tri pikët falë suksesit 0-1 në Marseille.





Lajmet e fundit nga