Gjermani-Itali për gjysmëfinalen/ Spalletti premton ndryshime, Nagelsmann: Më kujtohet 2006...

22 Mars 2025, 21:36, Sport CNA

Gjermani-Itali për gjysmëfinalen/ Spalletti premton ndryshime,

Gjermania fitoi 2-1 ndeshjen e parë çerekfinale ndaj Italisë në Ligën e Kombeve, ndërsa tani do të luajë në shtëpi për sfidën e kthimit.

Në Dortmund, pritet një sfidë shumë e bukur dhe e luftuar, ku dy kombëtaret e mëdha europiane, synojnë të avancojnë për në gjysmëfinale.

Gjermanët kanë avantazhin e fitores në ndeshjen e parë, por trajneri Julian Nagelsmann, deklaroi se në fushë do të mendojnë sikur rezultati është 0-0.

Në konferencën për shtyp, Nagelsmann deklaroi se ekipi i tij synon një tjetër fitore, këtë herë në shtëpi, ndonëse i pranoi vështirësitë.

“Do e mendojmë ndeshjen 0-0. Do përpiqemi të fitojmë në shtëpi. Pres një sfidë të ngjashme me atë të parën. Pres të shohim shumë gjëra nga ato në Milano. Më kujtohet viti 2006. Nuk jam ende i lumtur që Gjermania nuk fitoi. Megjithatë për mua është më e rëndësishme të flasim për të tashmen dhe jo për të shkuarën. Ne duam të shkruajmë historinë tonë. Nuk kam frikë nga shpejtësia e italianëve. Ne jemi në formë të mirë, jemi vigjilentë. Kemi zgjidhje të mira për këtë përballje. Nuk kemi vendosur ende për formacionin. Të dyja skuadrat kanë bërë mirë në ndeshjen e parë. Gorecka do të luajë titullar. Ai ishte mirë në mbrojtje dhe në sulm, prandaj do të jetë në fushë”, deklaroi Nagelsmann.

Në krahun tjetër, trajneri i Italisë, Luciano Spalletti deklaroi se do të ketë ndryshime në formacion, ndërsa kërkoi nga skuadra e tij të përsërisë ndeshjen e parë, pavarësisht humbjes.

“Do të bëj katër ndryshime në formacion. Ka disa humbje që i bëjnë gjërat të duken sikur nuk kanë ndodhur kurrë. Kjo ishte e tillë. Pësuam dy gola për shkak mungesës së përqendrimit. Në bëmë atë që duhej për të fituar, por nuk ia dolëm. Në thelb do të përpiqemi të përsërisim të njëjtat gjëra për të marrë fitoren. Nëse bëjmë të njëjtat gjëra si në ndeshjen e parë, rezultati do të jetë i ndryshëm. Në fushë do të hedh më pak imagjinatë për zgjedhjet individuale”, deklaroi Spalletti

Ndeshja Gjermani-Itali do të luhet mbrëmjen e kësaj të diele, duke nisur nga ora 20:45, në stadiumin “Signal Iduna Park”.