E fundit!

09:24 Kronika

Pjesë e grupeve kriminale/ Pritet ekstradimi i 6 personave të kapur në Dubai

Pritet të ekstradohen sot, në Shqipëri, 6 shtetasit e kapu...

Egnatia-Dinamo luhet për kreun, trajneri Daja premton spektakël

4 Mars 2025, 20:04, Sport CNA

Egnatia dhe Dinamo përballen mes tyre, në supersfidën e javës së 28-të në Superiore. Një sfidë ku spektakli është i garantuar nga të dyja ekipet, që do të kërkojnë me çdo kusht fitoren.

Egnatia vjen në këtë përballje si kryesuese dhe një 3 pikësh ndaj rivalit direkt do i shkëpuste në krye. Trajneri Edlir Tetova, e cilësoi si një mini Final Four, por shtoi se nuk mund të thuhet se është test për titullin.

“Janë shumë pak orë, afërsisht 55 orë në prag të ndeshjes tjetër. Janë shumë pak, megjithatë ne do të mundohemi. Grupi ka qenë mirë, nuk ka pasur dëmtime. Janë 5 mungesat që vazhdojnë, rikthehet Lushkja, grupi është i përqëndruar te ndeshja e nesërme.

Është mini “Final Four”, do jetë ndeshje e kujdesshme, e mirëpërgatitur. Mendoj se Egnatia për vendin ku është mendon për 3 pikët.

Mendoj nuk është test për titullin kampion sepse është për t’u luajtur “Final Four” më mbrapa, janë dhe 9 ndeshje. Ka goxha ndeshje përpara, sigurisht është dozë drejt më së mirës, ngelet për t’u parë."

Në krahun tjetër, trajneri i Dinamos, Ilir Daja u shpreh se Egnatia kryeson me meritë dhe për shkak të lojës sulmuese që bëjnë dy ekipet, deklaroi se do të jetë ndeshje e hapur.

"Kemi përpara një ndeshje goxha të vështirë, sepse Egnatia me plot meritë kryeson klasifikimin dhe është kampione në fuqi. Edhe Vllaznia e Partizani kanë bërë kampionat të mirë, edhe Elbasani duke hapur pak garën. Jemi 4-5 ekipe që luftojmë në pjesën e sipërme të renditjes.

Egnatia ka një manovër të konsoliduar dhe meritë ka trajneri dhe stafi i tij. Ka një kontingjent me role të dubluara. Tani ka edhe një stadium të ndriçuar, që i ka dhënë më shumë bukuri dhe e ka kompletuar si klub.

Përtej të gjitha këtyre, edhe ne jemi një ekip që kemi bërë mirë. Vijmë nga një anë psikologjike e mirë, po na rikthehen lojtarët, pavarësisht se edhe këtë herë kemi mungesa. Do të jetë një lojë e hapur, sepse diferencën e golave e kemi të barabartë. Shpresoj të bëjmë sa më pak gabime. Nëse lëmë hapësira, lojtarët e Egnatias bëjnë dëm në çdo moment.

Duhet përqendrim për të tentuar maksimumin edhe në Rrogozhinë. Ndeshja nuk i ngjan ndeshjes. Barazimi i fundit nuk ka ndikuar tek Egnatia. Edhe ne kemi potencialin e duhur për të bërë mirë në Rrogozhinë, i kemi të gjitha mundësitë. Kemi edhe ne individë që mund të dëmtojnë. Do të jetë spektakli brenda, kush do të jetë më pragmatist, do të shkojë te fitorja."

Ndeshja Egnatia-Dinamo, do të luhet këtë të mërkurë, në Rrogozhinë, duke nisur nga ora 16:30.