Rrezikonte 99 goditje me kamxhik, merret vendimi për Ronaldon

3 Mars 2025, 19:29, Sport CNA

Cristiano Ronaldo, nuk do të jetë i pranishëm në ndeshjen e parë të fazës së 1/16-ve të Ligës së Kampionëve Aziatike mes Al Nassr dhe Esteghlal. Klubi saudit ka vendosur të mos e grumbullojë yllin portugez për këtë përballje të rëndësishme, jo për arsye sportive, por për shkak të një çështjeje të ndjeshme ligjore që lidhet me autoritetet iraniane.

Gjithçka nisi në shtator të vitit 2023, kur Al Nasr ishte në Teheran për një ndeshje kundër Persepolis. Gjatë qëndrimit në kryeqytetin iranian, skuadra saudite u përball me një pritje madhështore nga mijëra tifozë, të cilët kishin mbushur rrugët dhe hotelin ku qëndronte ekipi, me qëllimin e vetëm për të parë nga afër Ronaldon.

Në mesin e tifozëve ndodhej edhe një artiste iraniane me aftësi të kufizuara, e njohur për talentin e saj të jashtëzakonshëm në krijimin e veprave artistike duke përdorur këmbët. Ronaldo, i njohur për gjestet e tij të solidaritetit dhe përkrahjes ndaj njerëzve me aftësi të kufizuara, u ndal për disa momente me të, duke e përqafuar dhe puthur në ballë si shenjë respekti dhe dashamirësie.

Por ky gjest, që në shumicën e vendeve të botës do të konsiderohej një akt mirësie dhe humanizmi, në Iran është interpretuar ndryshe. Sipas ligjeve morale të vendit, çdo formë e afërsisë fizike mes një burri dhe një gruaje që nuk janë të martuar konsiderohet një shkelje serioze, e cila në raste të veçanta mund të çojë deri në ndëshkime të rënda.

Pas këtij episodi, autoritetet iraniane kanë akuzuar Ronaldon për “shkelje të normave morale”, një akuzë që, sipas ligjeve të Republikës Islamike, mund të rezultojë në një ndëshkim fizik deri në 99 goditje me kamxhik.

Megjithëse nuk është e qartë nëse autoritetet iraniane do të ndërmerrnin vërtet masa të tilla ndaj një ylli botëror si Ronaldo, prania e tij në territorin iranian konsiderohet me rrezik të lartë. Kjo ka bërë që drejtuesit e Al Nasr të marrin një vendim drastik për të shmangur çdo lloj incidenti diplomatik apo ligjor, duke e lënë jashtë portugezin për këtë përballje.