web counter
LEXO PA REKLAMA!

SHKARKO APP

App Store
Google Play

E fundit!

x

Champions/ Dita e gjykimit për Milanin, Juve me 11 mungesa kundër ‘autoblindës’ PSG. Ja çfarë luhet në ndeshjet e fundit

2 Nëntor 2022, 09:27, Sport CNA

Champions League do të konfigurojë mbrëmjen e sotme panoramën komplete të 16 më të mirave të Europës. Milani luan me Salcburgun kalimin në 1/8 me Çelsin të sigurt në vendin e parë. Në tri grupet e tjera luhet për një vend në Europa League, me verdiktet pothuaj të vendosura në Champions.

Situata është e qartë për Çelsin në krye të grupit me 10 pikë. Londinezët do të presin në ndeshjen e fundit Dinamo Zagrebin, që mbyll renditjen me 4 pikë. Kroatët ëndërrojnë një vend në Europa League, por duhet të fitojnë në "Stamord Bridge" dhe të shpresojnë që Milani do të mposhtë Salcburgun. Kuqezinjtë kanë 7 pikë, por nuk rrezikojnë Çelsin për vendin e parë, të mundur në dy takimet direkte.

Austriakët kanë një pikë më pak dhe me një barazim mund të sigurojnë Europa League, por jo kalimin në 1/8. Në këtë rast fati do t'i buzëqeshte Stefano Pioli: “Në fushë për një barazim? Jo, jemi mësuar të sulmojmë, nuk duhet të ndryshojmë mënyrën tonë të të luajturit – shpjegoi tekniku i Milanit – Duhet të bëjmë në fushë përfaqësimin më të mirë të mundshëm”.

Vendi i parë është ende në lojë në ndeshjet e fundit të grupit. Real Madridi nuk duhet të ketë probleme, në shtëpi kundër Sëlltikut të vendit të fundit e jashtë çdo objektivi. Por dy ndeshje pa fitore e kanë vënë në dyshim surpremacinë e merengues.

Lajpcigu kërcënon kreun e "Blancos" (10), duke qenë vetëm një distancë larg. Gjermanët janë skuadra e vetme që i kanë mundur në këtë edicion të Champions të besuarit e Ançelotit. Skuadra e Red Bull, megjithatë, duhet të ruhet nga Shahtjar Donjetsk. Një fitore e ukrainasve do t’i barazonte me pikë dhe atëherë do të avanconte më tej Shahtjar, i fortë në 4-1 e debutimit.

Gjërat duken të vendosura në këtë grup. Mançester Siti është i pari dhe nuk rrezikon edhe në rast humbjeje me Kopenhagen (2). Danezët janë të fundit dhe jashtë të gjitha lojërave, edhe në rast triumfi të bujshëm. Fitorja nuk do ta ndihmonte të kalonte Seviljën për një vend në Europa League, për shkak të humbjes 3-0 në ndeshjen direkte.

E njëjta situatë është edhe për Citizens, që do të shkojnë në 1/8 si vendi i parë. Skuadra e Guardiolës kryeson me 11 pikë dhe edhe nëse arrihet nga Dortmundi, që në ndeshjen tjetër luan kundër Seviljës, ka avantazhin e fitores 2-1 në përplasjen direkte. Gjermanët janë të dytët dhe me 8 pikë nuk rrezikojnë të kalohen nga spanjollët (5), sepse kanë avantazhin e 1-4 së marrë në Pizjuan.

Luhet për vendin e parë në grup, me PSG e Benfikën, me 11 pikë, të thirrur në çështje të fitojnë ndeshjet e fundit. Kampionët e Francës duhet të bëjnë rezultat në Torino kundër Juventusit, të eliminuar, por me objektiv kalimin në Europa League. Benfika në ndeshjen tjetër luan në Izrael kundër Makabi Haifa, që ka 3 pikë sa Juventus. Bardhezinjtë duhet të bëjnë rezultat më të mirë se izraelitët në të kundërt janë jashtë.

Por Alegri ka mungesa të pafund për përplasjen me PSG-në e frikshme. Tekniku ka rikuperuar pjesërisht Angel di Marian dhe Bremerin. Të dy nuk do të jenë në dispozicion për ndeshjen, por vetëm në kampionat. I vetmi i rikuperuar e që do të jetë në fushë është Lokatelli. Jashtë edhe McKennie e Iling Jr, që e çojnë në 11 numrin e lojtarëve të padisponueshëm të bardhezinjve. Për Vlahoviç do të merret një vendim në minutën e fundit.

Pikërisht mungesat, për teknikun e PSG-së, Galtier, janë shkaku i daljes së Juves nga Champions-i: “Thjesht mendoj se Juventusit i munguan lojtarët në dispozicion. Të nevojshëm, nga i pari tek i fundit, për këtë lloj ndeshjesh. Këto janë sfida ku mungesat e Pogbasë dhe Kiezës janë thelbësore”.

Tekniku i parisienëve ndërkohë paralajmëron Benfikën se nuk heq dorë nga vendi i parë: “Ka pritshmëri të mëdha këtë vit, në Francë, për PSG-në, por edhe për Europën. Skuadra ka në organikë kampionë të mëdhenj, ka përvojë të madhe. Fatkeqësisht, nuk e kemi fituar kurrë këtë trofe kaq prestigjioz, kaq të vështirë për t’u fituar. E ndonjëherë garat janë të çmendura: gjithçka kthehet përmbys në një çast. PSG mund të jetë afër suksesit, le të shpresojmë që ky të jetë viti i duhur”.

Champions League Grupi E
21:00 AC Milan – FC Salcburg
21:00 Çelsi – Dinamo Zagreb
Champions League Grupi F
18:45 Real Madrid – Sëlltik
18:45 Shahtjar Donjetsk – RB Lajpcig
Champions League Grupi G
21:00 FC Kopenhagen – Borusia Dortmund
21:00 Mançester Siti – Sevilja
Champions League Grupi H
21:00 Juventus – Paris Saint-Germain
21:00 Makabi Haifa – Benfika





Lajmet e fundit nga