web counter
LEXO PA REKLAMA!

SHKARKO APP

App Store
Google Play

E fundit!

x

Zhupa: Qeveria ka miratuar 5 ligje klienteliste, qasje antieuropiane ndaj pronës

14 Maj 2026, 15:37, Politikë CNA

Zhupa: Qeveria ka miratuar 5 ligje klienteliste, qasje antieuropiane ndaj

Deputetja e Partisë Demokratike, Ina Zhupa, akuzoi sot qeverinë se ka miratuar pesë ligje për pronën në kundërshtim me direktivat europiane dhe procesin e integrimit europian.

Duke folur në Kuvend, Zhupa u shpreh se këto ligje janë ligji i Investimeve Strategjike, i Zonave të Mbrojtura, “Paketa e Maleve”, për portet turistike dhe Korporata e Investimeve Shqiptare.

“Ky Parlament ka miratuar, si në asnjë vend të BE-së, dhe kundër çdo direktive, kundër MSA-së, kundër Kartës Europiane, 5 ligje klienteliste me porosi, që përbëjnë paketën e gllabërimit të pronës publike dhe private. 5 ligjet janë:

Ligji i Investimeve Strategjike, që dhuronte tokat publike në bregdetin shqiptar tek oligarkët, bashkë me lehtësira të tjera.

Ligji i Zonave të Mbrojtura, që hiqte çdo mbrojtje në këto zona për të ndërtuar edhe aty pa asnjë ndalesë, për të dhuruar pasurinë kombëtare. Siç janë futur sot fadromat në Pishë-Poro. Një ligj që BE-ja thotë specifikisht të shfuqizohet.

Ligji 'Paketa e Maleve', për të dhuruar edhe pronën private të atyre që janë të pamundur, që ai që ka para, përveçse të gllabërojë pronën publike, të marrë edhe atë private.

Ligji i porteve turistike, ku oligarkët, veç tokave, të kenë edhe portet e tyre private pa konkurrencë.

Dhe ligji i Korporatës së Investimeve Shqiptare, që prona shtetërore në Tiranë e kudo të jepet për kulla, siç pritet të ndodhë me Pallatin e Brigadave dhe Pallatin e Kongreseve.

Kjo paketë prej 5 ligjesh antipronë tregon qartësisht që jeni qeveria më antieuropiane që ka pasur vendi”,-theksoi Zhupa./CNA





Lajmet e fundit nga