Zbardhet mbledhja e PD-së/ Bardhi paralajmëron debate të ashpra me mazhorancën, qëndrimi i Berishës

18 Tetor 2023, 15:50, Politikë CNA

Zbardhet mbledhja e PD-së/ Bardhi paralajmëron debate të ashpra

Ditën e djeshme, grupi parlametar i PD-së mbajti një mbledhje, ku pati diskutime në lidhje me aksionin opozitar.

Deputeti Gazment Bardhi kërkoi që kolegët të mos lejojnë zhvillimin e një seance plenare normale derisa të merren parasysh kërkesat e tyre për Komisionin e Posaçëm të Reformës Zgjedhore.

“Do të duhet të kemi një qëndrim. Mazhoranca po na bllokon çdo hapësirë institucionale. Kanë asgjësuar parlamentarizmin. Opozita nuk duhet të lejojë që të zhvillohet aktivitet normal parlamentar, përderisa mazhoranca do të vazhdojë të rrezojë kërkesat e opozitës për komisionet hetimore parlamentare, apo mospranimin e ndryshimit të anëtareve të Komisionit të Posaçëm të Reformës Zgjedhore. Kjo që po ndodh aktualisht s’ka ndodhur kurrë me opozitën. Është asgjësuar çdo hapësirë. Praktikisht na kanë vënë në kushtet kur ata vendosin gjithçka për ne. Do duhet të kemi një qëndrim të prerë. Unë pres nga ju propozime dhe duhet të dalim me një vendim se çfarë duhet të bëjmë”, deklaroi Bardhi.

Nga ana tjetër, ish-kryeministri Sali Berisha ka pasur një tjetër propozim.

Berisha deklaroi se duhet dërguar një letër publike ndërkombëtarëve, për t’i vënë në dijeni për trajtimin e kërkesave të opozitës.

Gjithashtu, kryedemokrati sugjeroi që të mblidhen bashkë me partitë aleate të PD-së ku të diskutohet mbi situatën.

“Mendoj se ne duhet të bëjmë një letër, edhe publike, dhe t'ua shpërndajmë kancelarive, ndërkombëtare dhe t’i vëmë në dijeni se çfarë po ndodh në parlamentin shqiptar, se çfarë po ndodh me opozitën. Më pas duhet të mbledhim partitë aleate, ku mund të diskutojmë për situatën në fjalë dhe hapi i fundit është përplasja, në mënyrë që të mos lejojmë zhvillimin normal të seancave parlamentare, por t’i bllokojmë ato”, tha ai, ndërkohë që kërkoi që bojkoti të hiqet nga agjenda e opozitës.

“Mendoj që bojkoti nuk është opsion si mekanizëm për t’u përdorur nga ana jonë, pra bojkoti i parlamentit. Nuk do të përdorim ato praktika që janë përdorur më parë, (I referohet djegies së mandateve, braktisja e zgjedhjeve) por do të përdorim çdo mjet demokratik që askush të mos marrë nëpër këmbë opozitën, siç ndodhi në seancën e fundit parlamentare”, nënvizoi Berisha./ CNA