web counter
LEXO PA REKLAMA!

SHKARKO APP

App Store
Google Play

E fundit!

x

"'The Albanian Files', nuk është libri im"/ Rama: U përdor nga fryma e bulevardit për akuza ndaj meje

28 Qershor 2026, 09:46, Politikë CNA

"'The Albanian Files', nuk është libri im"/ Rama:

Kryeministri Edi Rama, në episodin e sotëm të podcastit “Flasim” ka folur lidhur me librin “The Albanian Files”.

Rama është shprehur se ai libër është vendosur nën shënjestër nga protestuesit për të ngritur akuza të tjera ndaj tij. Ai tha se ky botim nuk është i kontrolluar nga ai dhe as nuk është vepër e tij.

Kreu i qeverisë shtoi se kontributi i tij i vetëm në atë libër është parathënia. Ndër të tjera lidhur me letrën e arkitektit Reneir de Graf, Rama shprehet se është pjesë e dosjes personale të tij.

Ai bëri me dije se ky autor njihet për stlin e shkrimit ironik, paradoksal, hiperbolik por që sipas Ramës nuk bën deklarata politike lineare.

“Nuk dua të flas për librin por për një inkuizicion që ka nisur lidhur me librin dhe që buron nga fryma e bulevardit ku protesta e filluar për natyrën ka krijuar shumë degë të tjera. Një nga degët është dega që “përndjek” me fjalë me akuza, me shpifje një nga grupet më të rëndësishme që i ka ndodhur dhe që i janë qasur Shqipërisë në këto 30 vite. Njerëz të cilët e kanë bërë emrin e tyre në skenën e arkitekturës botërore. Janë mbledhur në Shqipëri duke dhënë kontribute që do të bëjnë që vajzat dhe djemtë e këtij vendi të nxjerrin nesër nga gjiri i tyre një ose më shumë se një emër shqiptari që do të shkëlqejë në skenën e botës.

"The Albanian Files" është vendosur në shënjestër nga inkuizicioni revolucionar i protestës. Ndërkohë që nuk është libri im dhe botim i kontrolluar prej meje. Vetëm kam dhënë kontribut me një tekst parathënës që është patjetër krenari që unë të isha i ftuar ta shkruaja. Së bashku me të gjithë këtë armatë profesionistësh dhe arkitektësh.
Ka ardhur si një projekt editorial tërësisht i pavarur. Ka gjëra të diskutueshme edhe të debatueshme por ti qerpesh një botimi të tillë dhe pastaj të kapesh me një tekst që është autoironik i një arkitekti që përfaqëson një prej studiove më të mëdha në historinë e arkitekturës ky është kulmi.

Ky tekst i vënë aty në mënyrë autoironike është një letër drejtuar mua. Libri është tërësisht i lirë, i pakontrolluar, të gjithë pjesëmarrësit kanë pasur pavarësi të plotë në dosjet e tyre. Letra është pjesë e dosjes personale të autorit. Vetë “files” është një referencë ironike e një Shqipërie që vjen nga një kohë dosjesh. Po të ishte botim i kontrolluar politikisht ky tekst nuk do të mbetej aty. Letra e Reneir de Graf na thotë se së pari duhet njohur autori. Ka një stil botërisht të njohur ironik, paradoksal, hiperbolik por nuk bën deklarata politike lineare. Shkruan në të njëjtën mënyrë edhe për shtete të tjera. E gjithë kjo kthehet në një nga shumë tekstet e akuzës inkuizicionale që më bëhet mua”, tha kryeministri Rama. /CNA





Lajmet e fundit nga