Të gjitha detajet/ Çelet nesër grupkapitulli i fundit i negociatave me BE-në

16 Nëntor 2025, 19:20, Politikë CNA

Të gjitha detajet/ Çelet nesër grupkapitulli i fundit i

Ditën e hënë, më 17 nëntor do të çelet grupkapitulli i fundit i negociatave. Nesër është paërcaktuar të mbahet Konferenca e 7-të Ndërqeveritare Shqipëri- BE në Bruksel.

Ky çast shënon hapjen e të gjithë kapitujve të negociatave të integrimit të vendit.

Siç bëhet me dije, kryeministri Edi Rama do të jetë nesër i pranishëm në Konferencën e madhe.

Konferenca do të nisë në orën 8:00 dhe do të pasohet nga një konferencë për shtyp rreth orës 9.20.

Pas përfundimit të punimeve, Kryeministri Rama, Komisionerja për Zgjerimin e BE-së, Marta Kos dhe Ministrja e Punëve të Jashtme të Danimarkës, Marie Bjerre do të mbajnë një Konferencë të përbashkët për shtyp.

-Grupkapitulli V përfshin pesë kapituj thelbësorë për zhvillimin ekonomik dhe social të vendit, me ndikimin më të drejtpërdrejtë tek prodhimi, konkurrueshmëria dhe zhvillimi i balancuar i territorit:

“Bujqësia dhe Zhvillimi Rural” (kapitulli 11);

“Politikat e sigurisë ushqimore, veterinarisë dhe fitosanitare”, (kapitulli 12);

“Peshkimi” (kapitulli 13);

“Politika rajonale dhe koordinimi i instrumentave strukturore” (kapitulli 22), si dhe

“Dispozitat Financiare dhe Buxhetore (kapitulli 33).

Përmes këtij Grupkapitulli, Shqipëria përfiton lidhur me modernizimin e bujqësisë, rritjen e kapaciteteve prodhuese dhe dixhitalizimin e zinxhirit ushqimor. Një vend të veçantë zë forcimi i mekanizmave të kontrollit të sigurisë ushqimore dhe përafrimi me standardet e BE-së, ndërsa sektori i peshkimit dhe akuakulturës synon të përfitojë nga rregullat dhe programet europiane për menaxhim të qëndrueshëm.

Në komponentin e kohezionit, Shqipëria adreson rritjen e kapaciteteve për menaxhimin e fondeve të BE-së dhe përgatitjen për pjesëmarrje efektive në politikat e zhvillimit rajonal.

Ndërkohë, kapitulli për dispozitat financiare dhe buxhetore përfshin përputhjen me praktikat europiane për transparencë, planifikim buxhetor dhe administrim të fondeve publike./CNA