web counter
LEXO PA REKLAMA!

SHKARKO APP

App Store
Google Play

SPAK-u të hetojë Bufin e Roskovecit/ Baçi: Ka kryer krim zgjedhor

24 Janar 2025, 15:20, Politikë CNA

SPAK-u të hetojë Bufin e Roskovecit/ Baçi: Ka kryer krim

Deputeti i Partisë Demokratike, Luan Baçi, në një reagim nga selia blu, theksoi se SPAK-u duhet të marrë në hetim kryetaren e Bashkisë së Roskovecit, Majlinda Bufin. Baçi u shpreh se ajo ka kryer krim zgjedhor dhe si e tillë duhet që të jetë objekt i SPAK-ut dhe jo i Prokurorisë së Rrethit.

“SPAK-u po tregon çdo ditë e më shumë se nuk është asgjë tjetër vetëm se një degë e partisë në pushtet.

Kryetaren e Bashkisë së Roskovecit, Majlinda Bufi, SPAK-u refuzon të hetojë. Prej datës 9 maj 2023  në tryezën e prokurorëve të këtij institucioni, ndodhej kallëzimi penal me numër 66 i bërë nga Sekretari i Përgjithshëm i PD-së, Flamur Noka, për dy vepra penale, ‘Shpërdorim detyre’ dhe ‘Kanosje apo dhunim të pjesëmarrësve në zgjedhje’.

Rasti është bërë publik më datë 4 maj të vitit 2023 nga emisioni ‘Piranja’, ku tregohet se një punonjëse e bashkisë largohet nga puna vetëm e vetëm se mori pjesë në një takim të organizuar nga opozita në këtë qytet.

Dhe jo vetëm kaq, por në përgjimet e bëra nga gazetarët investigativë, del qartazi dhe presioni që Majlinda Bufi ushtron ndaj familjarëve të punonjëses për të mos dalë në ditën e votimit, vetëm e vetëm se ata nuk mendojnë dhe nuk votojnë siç do ajo.

Më shumë se një vit pas këtij denoncimi, SPAK-u ka hequr dorë nga hetimi i Bufit dhe ia ka kaluar çështjen për hetim prokurorisë së Rrethit Fier. Një veprim i ngjashëm me dosjen '189' të Dibrës, të cilën Prokuroria e Krimeve të rënda dje dhe SPAK-u i sotëm refuzoi ta hetojë.

Edhe sot Majlinda e partisë që e drejton bashkinë si ta ketë feudin e saj, refuzon të hetohet nga SPAK-u i partisë. Më këtë qëndrim, SPAK-u nuk po jep miratimin që Bufi i Roskovecit të vazhdojë të vjedhë fondet publike, shantazhojë qytetarët apo manipulojë votat, një punë të cilën ajo e bën më mirë se çdo tjetër.

Pra, SPAK-ut të partisë nuk i mjafton kërcënimi i drejtpërdrejtë me zë i kryetares ndaj një punonjësi thjesht se ka marrë pjesë në takimin e opozitës nuk i mjafton mënyra se si përpiqet që të orientojë votën e një familjeje të thjeshtë për ta marrë nën hetim.

Majlinda Bufi ka kryer krim zgjedhor dhe për vetë funksionin që ka duhet të jetë objekt i SPAK-ut dhe jo i prokurorisë së rrethit.

Por duket qartë se tashmë në prag të zgjedhjeve parlamentare Edi Rama me Belinda Ballukun po mundohen të shpëtojnë ç’të munden nga veglat e tyre, me qëllim ripërdorimin e tyre në zgjedhjet e 11 majit.

Por sado që të përpiqen për të shpëtuar bashkëpunëtorët që s’janë tjetër vetëm se pjesë e makinerisë së vjedhjes shtetërore dhe manipulimit të votave, sërish nuk do t'i shpëtojnë gjykimit dhe ndëshkimit qytetar të votës së 11 majit”, tha Baçi. /CNA





Lajmet e fundit nga