web counter
LEXO PA REKLAMA!

SHKARKO APP

App Store
Google Play

E fundit!

x

Shpërthimet e Ramës pas arrestimit të Veliajt/ Si i shpjegon psikoterapisti

20 Shkurt 2025, 13:23, Politikë CNA

Shpërthimet e Ramës pas arrestimit të Veliajt/ Si i shpjegon

10 shkurti ishte një ditë e vështirë për kryeministrin Edi Rama, i cili u detyrua të kthehej me urgjencë në Tiranë pas lajmit për arrestimin e kryebashkiakut Erion Veliaj, që akuzohet për korrupsion dhe pastrim parash.

Kryeministri një ditë më parë pati disa shpërthime gjatë bashkëbisedimit me ndjekësit duke thënë se është emocional, ndërsa filloi sulmin e ashpër ndaj prokurorit dhe gjyqtarit.

Po si i shpjegon shpërthimet e Ramës psikoterapisti Neli Demi.

Për Birn, ai është shprehur se reagimet e tij pas arrestimit të Veliajt quhen apel emocional në psikologjinë politike, një teknikë që synon të largojë vëmendjen nga argumentet racionale dhe ta orientojë atë drejt reagimeve instinktive dhe ndjesore.

“Kjo sjellje, në mënyrë të qëllimshme, zakonisht përdoret për të treguar dominim, për të shmangur perceptimin e dobësisë dhe për të dhënë mesazhin se ai është ende në kontroll të situatës,” tha Demi, i pasigurtë nëse në reagimet e para, gjuha verbale dhe trupore e kryeministrit kanë qenë plotësisht të përllogaritura.

Demi e analizon më tej ligjërimin e Ramës si një kombinim mes “gjuhës emocionale, agresivitetit verbal dhe një strategjie të dyfishtë për të mbrojtur veten, pa u shfaqur hapur kundër SPAK-ut”.

“Në këtë mënyrë, ai po synon të aktivizojë instinktet e solidaritetit dhe ndjeshmërisë te popullata që në fakt së shpejti do të jenë edhe votues, ndërsa përpiqet të krijojë një narrativë ku drejtësia është bërë e padrejtë,” shtoi ai.

Edhe Ergys Mërtiri, sociolog me profesion dhe një kritik i kryeministrit Edi Rama, i analizon reagimet e këtij të fundit në dritën e përpjekjes për të ndikuar opinionin publik, shkruan Birn.

“Arrestimi i Veliajt ndikon në imazhin e tij duke e ekspozuar atë si kryetar të një grupi politikanësh të korruptuar, çfarë sigurisht e njollos përpara opinionit publik,” tha Mërtiri.

“E paraqet atë si të dobët përpara njerëzve të tij si dhe elektoratit, si një kryeministër që ia arreston prokuroria bashkëpunëtorët në zyrë. Për këtë arsye, atij i duhet të kompensojë këtë me gjuhë agresive për të treguar se ai nuk është i dobët dhe se ai nuk pyet as për SPAK e GJKKO,” shtoi ai.

Demi dhe Mërtiri vërejnë megjithatë një kontradiktë të madhe në ligjërimet e fundit të Ramës, ku nga njëra anë sulmon gjyqtarin dhe prokurorin e çështjes së Veliajt dhe në anën tjetër e portretizon veten si “pronar” të reformës në drejtësi.

“Një sulm i hapur ndaj SPAK-ut do të tingëllonte si hipokrizi, dhe për këtë arsye ai menjëherë pas reagimit agresiv të fillimit, u përpoq t’i rikthehet mbrojtjes së 'pronës'”, analizon Demi.

“Kjo duket si një teknikë e njohur e dezinformimit politik, ku protagonisti politik përpiqet të mbajë të dyja anët e një çështjeje të debatuar për të minimizuar dëmin politik,” shtoi ai./ CNA





Lajmet e fundit nga